Maratha Reservation: जरांगे पाटील यांनी आमदार सोळंकेंना चांगलेच फैलावर घेतले!

दत्ता देशमुख

Maratha Reservation Politics : बीड येथे झालेल्या कार्यक्रमात मराठा आरक्षणाचे नेते मनोज जरांगे पाटील यांनी राष्ट्रवादी काँग्रेसचे आमदार प्रकास सोळंके यांना चांगलेच फैलावर घेतले. जरांगे पाटील यांनी आपल्या भाषणातच थेट सोळंके यांना लक्ष्य केल्याने सोळंके बचावात्मक स्थितीत आहेत. (NCP MLA Prakash Solanke is on Manoj Jarange`s Target)

राष्ट्रवादी काँग्रेसचे (NCP) आमदार सोळंके यांची एक ऑडिओ क्लिप व्हायरल झाली आहे. या क्लिपमध्ये मराठा आरक्षणाबाबतचा (Maratha Reservation) संवाद आहे. त्यामुळे जरांगे पाटील यांनी सोळंके यांच्यावर टीका केली.

मराठा समाजाला सरसकट कुणबी प्रमाणपत्र आणि आरक्षण मिळावे, यासाठी मनोज जरांगे पाटील यांचे अंतरवाली सराटी (जालना) येथे दुसऱ्या टप्प्यातील उपोषण सुरू असताना माजलगाव मतदारसंघातील एका कार्यकर्त्याने आमदार सोळंके यांना फोन केला होता. त्या संवादात मराठा आरक्षण आणि जरांगे पाटील यांच्याविषयी विचारणा केल्यावर आमदार सोळंके यांनी जरांगे पाटील यांच्याविषयी उपहासात्मक टिप्पणी केली. त्याची कथित ऑडिओ क्लिप व्हायरल झाली होती. ही क्लिप व्हायरल झाल्यावर मराठा समाजाच्या आंदोलकांमध्ये तीव्र संताप व्यक्त करण्यात आला.

माजलगाव येथे ३० ऑक्टोबरला आमदार सोळंके यांच्या घरावर दगडफेक आणि जाळपोळ झाल्याची घटना घडली होती. त्यानंतर पोलिसांत आंदोलन, तोडफोड आणि जिवे मारण्याच्या कलमाखाली गुन्हा दाखल करण्यात आला होता.

दरम्यान, त्याआधीच ऑडिओ क्लिप तयार करून समाजात आपल्याबद्दल संताप असल्याचे लक्षात आल्याने क्लिपचा चुकीचा अर्थ काढल्याचे सांगत आपण मनोज जरांगे पाटील यांना भेटणार असल्याचे आमदार सोळंके यांनी मुंबईत पत्रकार परिषदेत जाहीर केले. याच पत्रकार परिषदेत आपली कोणाविरुद्धही तक्रार नसून समाजाच्या आरक्षणाला आपला पाठिंबा असल्याचे त्यांनी सांगितले होते. आमदार प्रकाश सोळंके यांनी छत्रपती संभाजीनगरला उपचार घेत असलेल्या मनोज जरांगे पाटलांची भेट घेतली.

मात्र, जाळपोळ व दगडफेक प्रकरणात दाखल गुन्ह्यात राजकीय हेतूने प्रेरित नावे समाविष्ट केली जात असल्याचा सुरुवातीपासून आरोप आहे. याबाबतच्या तक्रारी अद्यापही कमी झालेल्या नाहीत. काही मंडळी आपल्या विरोधकांची नावे पोलिसांना पुरवत आहेत. पोलिस निरीक्षकदेखील सत्ताधारी नेत्यांना हवी तशीच भूमिका घेत असल्याच्या तक्रारी आहेत.

याबाबत जरांगे पाटील यांनी जालना येथील सभेत हा मुद्दा मांडला. त्यांनी आमदार सोळंके यांना चांगलेच फैलावर घेतले. एकीकडे माजलगावचे आमदार येऊन आमचे पाय धरतात आणि दुसरीकडे पोलिसांकडे काड्या करतात असा थेट आरोप त्यांनी केला. ऑडिओ क्लिप व्हायरल करणाऱ्याला गेल्या बारा दिवसांपासून कोठडीत डांबल्याचे जरांगे पाटील यांनी सांगितल्याने आमदार सोळंके जरांगे पाटलांचे लक्ष्य झाल्याने पुन्हा एकदा सोळंके यांचे टेन्शन वाढले आहे.