Manoj Jarange: जरांगेंनी भुजबळांना करून दिली जेलवारीची आठवण...

Nanded: "आजही गावखेड्यातील सर्व समाज बांधव एकोप्याने राहतात. एकमेकांच्या अडीअडचणीत मदत करतात. हा सलोखा आम्हाला कायम ठेवायचा आहे, पण कायदेशीर पदावर असलेली व्यक्ती जातीय तेढ निर्माण करणारे वक्तव्य करीत आहेत. त्यांना जाती जातीत भांडण लावायचे आहेत. हे त्यांचे मनसुबे यशस्वी होऊ देऊ नका. आरक्षणाचा लढा हा अंतिम टप्प्यात आला आहे. आरक्षण मिळाल्याशिवाय थांबायचे नाही. एकजूट राहून हा लढा जिंकायचा आहे. एकदा का आरक्षण मिळाले, की मग मात्र आरक्षणाला विरोध करणाऱ्यांना सोडणार नाही," असे प्रतिपादन मनोज जरांगे पाटील यांनी बारड (जिल्हा नांदेड) येथील मराठा आरक्षण जागर सभेत केले. या सभेत पुन्हा एकदा मंत्री छगन भुजबळ यांच्यावर तोफ डागली.

माजी मुख्यमंत्री अशोक चव्हाण यांचा बालेकिल्ला असलेल्या भोकर विधानसभा मतदारसंघातील बारड येथे मनोज जरांगे पाटील यांच्या सभेचे आयोजन करण्यात आले होते. या सभेला उत्स्फूर्त आसा प्रतिसाद मिळाला. या सभेला प्रदीप सोळंके यांनी मार्गदर्शन करून मराठा समाजाला तातडीने ओबीसी संवर्गातून आरक्षण देण्याची मागणी केली.

मनोज जरांगे पाटील म्हणाले, "मी किती शिकलोय याची माहिती घेण्यात आली. जे जास्त शिकलेत ते तीन वर्षे जेलमध्ये जाऊन आले आहेत. आम्हाला गावबंदीच्या पाट्या लावल्या म्हणून एक महिन्याची शिक्षा होते म्हणून सांगता, पण जातीय तेढ निर्माण करणारे वक्तव्य केल्याने तीन वर्षे शिक्षा होते हे कसे विसरतात, असा टोला मनोज जरांगे पाटील यांनी मंत्री छगन भुजबळ यांना लगावला.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

आरक्षणाच्या लढाईबद्दल माहिती देताना मनोज जरांगे पाटील म्हणाले की, राज्यात ३५ लाख कुणबी असल्याच्या नोंदी सापडल्या आहेत. या नोंद कायदा करण्यासाठी उपयुक्त आहेत. मराठा समाजाला आरक्षण वेळीच मिळाले असते तर जगातील सर्वात प्रगत जात म्हणून राहिली असती. आपल्या लेकरांच्या उज्वल भविष्यासाठी जागृत राहून एकजुटीने लढा सुरू ठेवण्याची गरज आहे. राज्यातील सरसकट मराठा समाजाला आरक्षण मिळाल्याशिवाय थांबायचे नाही, असे आवाहन जरांगेंनी केले.