Dhananjay Munde : मुंडे भावंडांच्या एकीसमोर विरोधकांचा निभाव लागणार का? कोणती रणनीती कामी येणार?

Parali Election News : भाजप नेत्या व मंत्री पंकजा मुंडे व राष्ट्रवादी काॅंग्रेसचे माजी मंत्री धनंजय मुंडे या बहीण-भावाच्या परळी नगरपरिषदेत 13 वर्षांनंतर हे दोघेही एकत्र निवडणूक लढवत आहेत. तर त्यांच्या विरोधात राष्ट्रवादी काॅँग्रेस शरद पवार व काॅँग्रेस या आघाड्या मैदानात उतरल्या आहेत.

बीड जिल्ह्याच्या राजकारणाचा केंद्रबिंदू असलेले परळी अनेकदा धक्कादायक निकाल आणि धक्कादायक राजकीय घडमोडींसाठी चर्चेत असते. यावेळीही त्यादृष्टीने सुरुवातीला राष्ट्रवादी कॉँग्रेस शरदचंद्र पवार पक्षाने पावले टाकली. दिवंगत मुंडे यांच्या विरोधात धनंजय मुंडे यांनी नगराध्यक्ष केलेले दीपक देशमुख यांना त्यांच्यापासून फोडले खरे पण कॉँग्रेसला सोबत घेता आले नाही.त्यामुळे अर्धवट कामे, त्याच कामांवर पुन्हा देयके उचलण्याचे प्रकार, भौतिक सुविधांचा अभाव असल्याने सामान्य परळीकरांच्या नाराजीचा फायदा उठविण्याऐवजी विरोधकांची ताकद राष्ट्रवादी कॉँग्रेस शरदचंद्र पवार पक्ष आणि कॉँग्रेस व वंचित बहुजन आघाडी अशा दोन गटांत विभागली गेली.

तर 13 वर्षांनंतर मंत्री पंकजा मुंडे व माजी मंत्री धनंजय मुंडे ही भावंडे महायुतीच्या निमित्ताने एकत्र निवडणुका लढविणार आहेत. या परळी नगर पालिका निवडणुकीतील महत्वाच्या बाबी आहेत. या ठिकाणी महायुतीसह राष्ट्रवादी कॉँग्रेस शरदचंद्र पवार पक्ष आणि कॉँग्रेस असे प्रमुख तीन पॅनेल आहेत. महायुतीने नगरसेवक पदाच्या दोन जागा बिनविरोध जिंकत येथे एंट्री केली आहे.

परळी म्हणजे दिवंगत लोकनेते गोपीनाथराव मुंडे यांची राजकीय कर्मभूमी. मतदार संघावर वर्चस्व ठेवणाऱ्या दिवंगत मुंडेंचे परळी नगर पालिकेवरही वर्चस्व असायचे. परंतु, २००१ सालच्या थेट जनतेतून नगराध्यक्षपदाच्या निवडणुकीत दिवंगत मुंडेंच्या नेतृत्वाखालील आघाडीला परळीतच पराभव स्वीकारावा लागला. राष्ट्रवादी कॉँग्रेसच्या राधाबाई बियाणी जनतेतून नगराध्यक्ष झाल्या. तर, भाजपच्या शशिकला कोरे यांचा पराभव झाला. मात्र, या निवडणुकीत भाजपचे सर्वाधिक नगरसेवक विजयी झाले. या पराभवाचा वचपा काढण्यासाठी दोन वर्षांनी पुन्हा राधाबाई बियाणी यांच्यावर अविश्‍वास आणला आणि निवडणूक लावली. पण, पुढच्या निवडणुकीतही त्यांनीच भाजपच्या उमेदवाराला धूळ चारत बाजी मारली आणि परळी नगर पालिकेवर राष्ट्रवादी कॉँग्रेसचाच झेंडा फडकवला.

त्यानंतर 2012 सालच्या परळी नगर पालिका निवडणुकीच्या निमित्तानेच राज्याच्या राजकारणात काका-पुतणे असा नवा अंक सुरु झाला. त्याची सुरुवात तशी २००९ सालच्या विधानसभा निवडणुकीच्या उमेदवारीच्या निमित्ताने सुरु झाली होती. दिवंगत मुंडे यांनी लोकसभेत प्रवेश केल्यानंतर परळी विधानसभेची उमेदवारी न मिळाल्याने धनंजय मुंडे नाराज होते. धनंजय यांनी परळीतून काही अपक्ष समर्थक विजयी केले आणि भाजपचे काही नगरसेवक फोडून त्यांनी दीपक देशमुख यांना नगराध्यक्ष केले. त्यानंतर देशमुख यांच्यासह दिवंगत पंडितअण्णा मुंडे यांचा राष्ट्रवादी कॉँग्रेसमध्ये प्रवेश झाला.

तेव्हापासून परळी नगर पालिकेवर धनंजय मुंडे यांच्या नेतृत्वाखालील राष्ट्रवादी कॉँग्रेसचे वर्चस्व आहे. 2017 साली पंकजा मुंडे परळीच्या आमदार आणि जिल्ह्याच्या पालकमंत्री असतानाही परळीत धनंजय मुंडेंच्या नेतृत्वाखालील राष्ट्रवादी कॉँग्रेसने भाजपची धूळधाण उडवली.

आताच्या निवडणुकीकडेही राज्याचे लक्ष लागले होते. मात्र, महायुती आणि भावंडे म्हणून पुन्हा परळीत मुंडे भावंडे एकत्र आले आहेत. परळीच्या नगर पालिकेसाठी महायुतीत राष्ट्रवादी कॉँग्रेसने 35 पैकी सर्वाधिक 23 जागा पदरात पाडून घेतल्या. जिल्ह्यात इतर पाच नगर पालिकेत भाजपचे स्वतंत्र पॅनेल उभा करणाऱ्या पंकजा मुंडे यांनी चाणक्षपणे दोन पाऊले मागे टाकत धनंजय मुंडेंच्या नेतृत्वाखालील पॅनेलमध्येच समर्थकांना महायुतीत सहभागी केले.

तर, दुसरीकडे खासदार बजरंग सोनवणे यांनीही निवडणुकीच्या दृष्टीने ओपनिंग चांगली करत धनंजय मुंडें चे समर्थक माजी नगराध्यक्ष दीपक देशमुख यांचाच राष्ट्रवादी कॉंग्रेसमध्ये प्रवेश घडवून आणला. त्यांच्या पत्नी संध्या देशमुख यांना राष्ट्रवादी कॉँग्रेस शरदचंद्र पवार पक्षाकडून उमेदवारीही देण्यात आली. मात्र, त्यांना महाविकास आघाडी म्हणून कॉँग्रेसला सोबत घेता आले नाही आणि सर्व जागांवर उमेदवारही उभा करता आले नाहीत. त्यामुळे आता महायुतीकडून राष्ट्रवादी कॉँग्रेसच्या (अजित पवार गट) पद्मश्री बाजीराव धर्माधिकारी, राष्ट्रवादी कॉँग्रेसच्या (शरदचंद्र पवार) संध्या दीपक देशमुख व कॉँग्रेसच्या मैमुना सय्यद हानिफ असा नगराध्यक्षपदासाठी तिरंगी सामना रंगणार आहे.

13 वर्षांनंतर मुंडे भावंड एकत्र निवडणूक लढवणार आहेत. निवडणुकीत भाजप व राष्ट्रवादी कॉँग्रेसला उमेदवारी वाटपात कसरत करावी लागली. दरम्यान, पद्मश्री धर्माधिकारी यांचे पती बाजीराव तसेच सासरे माणिकराव धर्माधिकारी परळीचे नगराध्यक्ष होते. त्यांच्या मागे दोन्ही मुंडे भावंडे ही त्यांची जमेची बाजू आहे. तर, संध्या देशमुख यांचे पती दीपक देशमुख अनेक वर्षे धनंजय मुंडे यांचे समर्थक राहिल्याने त्यांना मुंडेंच्या राजकीय खेळ्यांचे गणित आणि नगराध्यक्ष राहील्याने पालिकेच्या राजकारणाचीही चांगली जाण आहे.

कॉँग्रेसच्या मैमुना सय्यद हानीफ यांच्या यांचे पती सय्यद हानीफ कॉँग्रेसचे कट्टर समर्थक आहेत. भाजपमुळे (BJP) नाराज मुस्लिम समाजाचे त्यांना मोठे समर्थन असून वंचितलाही त्यांनी सोबतीला घेतले आहे. आता परळीकरांची नगर पालिकेबाबत नाराजी असली विरोधकांचेच दोन गट झाल्याने मतांमध्ये विभागणी होणार का कुणा एका मागे येणार हे येणारा काळ सांगेल. तर, मुंडे भावंडे एकत्र आल्यानंतर उमेदवारी अर्ज मागे घेण्याच्या दिवशी महायुतीतील शिवसेना आणि राष्ट्रवादी कॉँग्रेसने एकेक जागा बिनविरोध जिंकत उधळलेला विजयी रथ नगराध्यक्ष व नगरसेवक पदाच्या निवडणुकीतही असा सुसाट सुटतो हे पाहणेही औत्सुक्याचे आहे.