Shivsena-BJP News : परभणी जिल्हा परिषद निवडणुकीत नावापुरतीच युती, गंगाखेडमध्ये भाजप स्वबळावर लढणार

Parbhani ZP Election News : महापालिका निवडणुकीत युती तुटल्यानंतर शिवसेना-भाजप या दोन्ही पक्षांना फटका बसला. महाविकास आघाडीने सत्ता काबीज केली. या पराभवातून धडा घेत शिवसेना-भाजप नेत्यांनी जिल्हा परिषद निवडणुकीत युतीचा निर्णय घेतला खरा, पण तो फक्त दोन विधानसभा मतदारसंघातील गटांपुरती.

गंगाखेड विधानसभा मतदारसंघात मात्र भाजपने पुन्हा स्वबळाचाच नारा दिला. तर पाथरी विधानसभा मतदारसंघाबाबतचा निर्णय अद्याप घेण्यात आलेला नाही, अशी माहिती भाजप जिल्हाध्यक्ष सुरेश भूमरे व शिवसेना जिल्हाध्यक्ष आनंद भरोसे यांनी दिली.

जिल्हा परिषदेच्या एकूण 54 गटांसाठी निवडणूक होत आहे. या निवडणुकीत भाजप - शिवसेनेची युती होणार की नाही? याबाबत मोठी उत्सुकता असताना अर्ज भरण्याच्या शेवटच्या दिवशी दोन्ही पक्षांनी संयुक्त पत्रकार परिषद घेऊन युतीची घोषणा केली. भाजप जिल्हा परिषदेच्या 47 गटात आणि पंचायत समितीच्या 101 गणांवर निवडणूक लढवणार आहे.

परभणी विधानसभा मतदारसंघातील चारपैकी दोन जागा भाजपला तर दोन जागा शिवसेनेला देण्यात आल्या आहेत. परभणी महापालिकेत विरोधकांकडून झालेल्या पराभवाची परतफेड जिल्हा परिषद निवडणुकीत केली जाईल, असा इशाराही जिल्हाध्यक्ष भुमरे यांनी यावेळी दिला. केंद्र व राज्य सरकारच्या योजना ग्रामीण भागातील शेवटच्या घटकापर्यंत पोहोचल्या असून त्याचा सकारात्मक परिणाम निवडणूक निकालातून दिसून येईल, असा विश्वासही त्यांनी व्यक्त केला.