Piyush Goyal News : प्रदूषण मंडळाच्या परवानगीला विलंब, उद्योजकांच्या तक्रारीनंतर केंद्रीय मंत्री गोयल यांचा थेट पंकजा मुंडेंना फोन!

BJP Political News : मराठवाड्याची राजधानी असलेल्या छत्रपती संभाजीनगरमधील आॅरिक सिटीसह शेंद्रा-बिडकीन भागात मोठ्या प्रमाणात उद्योग येऊ पाहत आहेत. कोट्यावधींची गुंतवणूक करण्यास इच्छूक असलेल्या प्रकल्पांना येणाऱ्या अडचणींचा आढावा आज केंद्रीय मंत्री पियुष गोयल यांच्यासोबत उद्योजकांच्या झालेल्या बैठकीत घेण्यात आला. यात प्रदूषण मंडळाच्या परवानग्या मिळण्यात विलंब केला जातो, असा तक्रारीचा सूर उद्योजकांनी लावला.

यावर गोयल (Piyush Goyal) यांनी तात्काळ राज्याच्या पर्यावरण मंत्री पंकजा मुंडे यांना फोन लावून लक्ष घालण्यास सांगितले. शहरात महाराष्ट्र प्रदूषण विकास मंडळाकडून उद्योग सुरू करण्यासाठी लागणाऱ्या परवानगीसाठी तब्बल दीडशे दिवस लागत असल्याचे उद्योजकांच्या शिष्टमंडळाने मंत्री गोयल यांच्या निदर्शनास आणून दिले. अनेक उद्योगांच्या फायली अधिकाऱ्यांनी अडवून धरल्याचा आरोपही यावेळी करण्यात आला.

याची गंभीर दखल घेत पियूष गोयल यांनी थेट पर्यावरण मंत्री पंकजा मुंडे (Pankaja Munde) यांना फोन केला. प्रदूषण मंडळाच्या परवानगीचा कालवधी सात दिवसांवर आणून प्रलंबित फायली तातडीने निकाली काढाव्यात, अशी सचूना गोयल यांनी मुंडे यांना दिली. छत्रपती संभाजीनगरच्या औद्योगिक क्षेत्रात मोठ्या प्रमाणात गुंतवणूक झाली आहे. तर अनेक नव्या कंपन्या आपले प्रकल्प इथे उभारू पाहत आहेत.

अशा उद्योगांना प्रदूषण मंडळाकडून ना हरकत प्रमाणपत्र मिळविण्यासाठी दीडशे दिवस वाट पहावी लागते. एवढा प्रदीर्घ कालवधी कशासाठी? असा प्रश्न उद्योजकांनी मंत्री गोयल यांच्या भेटीत उपस्थित केला होता. कोट्यवधी रुपयांची गुंतवणूक आणि त्यातून होणारी रोजगार निर्मिती पाहता प्रदूषण मंडळाचे प्रमाणपत्र लवकर मिळावे, अशी अपेक्षा यावेळी व्यक्त करण्यात आली.

या पूर्वी मुख्यमंत्री देवेंद्र फडणवीस यांनी त्यांच्याकडे केलेल्या वैयक्तिक तक्रारीत लक्ष घालून त्या सोडवल्या होत्या. पण जे त्यांच्यापर्यंत पोहचू शकले नाहीत त्यांच्याबातीत दफ्तर दिरंगाई सुरूच असल्याचे यावेळी निदर्शनास आणून देण्यात आले. यावर पियुष गोयल यांनी पर्यावरण मंत्री पंकजा मुंडे व संबंधित अधिकाऱ्यांना दूरध्वनीकरुन अशी प्रमाणपत्रे देण्याचा कालावधी सात दिवसापर्यत आणण्याचे निर्देश दिले.