Beed Crime : पुण्यातील मर्डरनंतर बीडमधील तरूणाची हत्या : गणपती समोर नाचल्याचा व्हिडिओ पोस्ट केला अन् मित्रानेच घात केला

Beed News, 06 Sep : ऐन गणेशोत्सवात पुण्यात माजी नगरसेवक वनराज आंदेकर याच्या खुनाचा बदला घेण्यासाठी या खून प्रकरणातील आरोपी गणेश कोमकर मुलगा गोविंद कोमकर याची शुक्रवारी संध्याकाळी नाना पेठ येथे गोळ्या घालून हत्या करण्यात आली.

नाना पेठेतील हमाल तालीमजवळ एका इमारतीच्या पार्किंगमध्ये ही हत्या करण्यात आली. या घटनेमुळे पुणे हादरलं आहे. पुण्यात हा रक्तरंजित थरार घडला असातनाच आता बीडमधून एक धक्कादायक घटना समोर आली आहे.

ती म्हणजे बीड शहरातील स्वराज्य नगर भागात चाकूने हल्ला करत एका 25 वर्षीय तरुणाची निर्घृण हत्या करण्यात आली आहे. या हत्येमुळे पुन्हा एकदा बीडमधील कायदा आणि सुव्यवस्थेवर गंभीर प्रश्न उपस्थित केले जात आहेत. मिळालेल्या माहितीनुसार शुक्रवारी मध्यरात्री दोन वाजण्याच्या सुमारास विजय काळे हा मित्रांसोबत गणपती मंडळात डान्स करत होता.

या डान्सचा व्हिडिओ त्याने सोशल मीडियावर पोस्ट देखील केला. यानंतर त्याचा मित्र अभिषेक गायकवाडसोबक किरकोळ कारणावरून वाद झाला. याच वादातून अभिषेक गायकवाडने विजयच्या छातीत धारदार शस्त्राने वार केले.

यानंतर रक्ताच्या थारोळ्यात पडलेल्या विजयला उपचारासाठी तातडीने जिल्हा रुग्णालयात दाखल करण्यात आलं मात्र उपचारा दरम्यान डॉक्टरांनी त्याला मृत घोषित केलं. या घटनेनंतर आरोपी पळून एका डोंगराळ परिसरात लपून बसला होता.

याबाबतची माहिती शिवाजीनगर पोलिसांना मिळताच त्यांनी सापळा रचून आरोपीला अटक केली. मयत विजय काळे याची देखील गुन्हेगारी पार्श्वभूमी असून त्याच्यावर बीडसह राज्यभरात अनेक पोलीस ठाण्यात विविध गुन्हे दाखल असल्याची माहिती समोर आली आहे. मात्र, ऐन गणेशोत्सवात झालेल्या या हत्येमुळे बीड पुन्हा एकदा हादरलं आहे.