Sambhajinagar Cabinet Meeting : मराठवाडा वॉटर ग्रीडचा मुडदा कोणी पाडला; फडणवीसांचा विरोधकांना सवाल

Chhatrapati Sambhajinagar News : छत्रपती संभाजीनगरमध्ये शनिवारी होत असलेल्या मंत्रिमंडळ बैठकीतील घोषणांकडे सर्वांचे लक्ष लागले असतानाच राज्य सरकारकडून करण्यात येणाऱ्या मदतीच्या पॅकेजवरून विरोधकांकडून टीका केली जात आहे. त्या टीकेला उत्तर देताना मराठवाडा वॉटर ग्रीडचा मुडदा कोणी पाडला, असा सवाल करत उपमुख्यमंत्री देवेंद्र फडणवीस यांनी विरोधकांचे तोंड बंद करण्याचा प्रयत्न केला आहे. (Who suspended the Marathwada Water Grid; Devendra Fadnavis' question to opposition)

मंत्रिमंडळाच्या २०१७ मध्ये झालेल्या बैठकीत ४९ हजार कोटी रुपयांच्या पॅकेजची घोषणा आमच्या सरकारने केली होती. त्यामध्ये केवळ एक दोन गोष्टी वगळता सर्व निर्णयाची अंमलबाजवणी करण्याचा प्रयत्न केला आहे. मात्र, मधल्या अडीच वर्षांत महविकास आघाडी सरकारने कॊणताच निर्णय पुढे नेला नाही. त्यांनी उलट आमच्या काही योजनेला स्थगिती दिली. जलयुक्त शिवार, मराठवाडा वॉटर ग्रीड या दोन्ही महत्त्वाकांक्षी योजना होत्या. त्यातील मराठवाडा वॉटर ग्रीडला निधी न देता या योजनेचा मुडदा कोणी पाडला, असा सवाल उपमुख्यमंत्री देवेंद्र फडणवीस यांनी विरोधकांना विचारला आहे.

छत्रपती संभाजीनगरमध्ये शनिवारी होत असलेली मंत्रीमंडळ बैठक वादळी ठरण्याची शक्यता आहे. सत्ताधारी व विरोधकांकडून आरोप प्रत्यारोप होत असल्याने याकडे सर्वांचे लक्ष लागले आहे. मुख्यमंत्री एकनाथ शिंदे यांच्या पंचतारांकित हॉटेलमधील मुक्कामावर टीका झाल्याने त्यांना मुक्कामाचे ठिकाण बदलावे लागले आहे. त्यामुळे या दोन दिवसातील घटना व घडामोडीकडे सर्वांचे लक्ष लागेल आहे.

दरम्यान, आजच्या बैठकीतून मराठवाडा वॉटर ग्रीडला नवसंजीवनी मिळण्याची शक्यता आहे. तर दुसरीकडे देवेंद्र फडणवीस मुख्यमंत्री असताना सुरु करण्यात आलेल्या जलयुक्त शिवार योजनेला गती देण्याची शक्यता आहे. या दोन्ही प्रकल्पांना महाविकास आघाडी सरकारच्या काळात स्थगिती दिली होती. त्यामुळे या दोन्ही योजनांना पुनरुज्जीवन देऊन मराठवाडयातील दुष्काळ कायमस्वरूपी हटविण्यासाठी महायुती सरकारकडून मोठे पॅकेज घोषित करण्याची शक्यता आहे.