Marathwada Municipal Corporations : मराठवाड्यात महिलाराज! पाच महापालिकेतील महापौर पदासाठी असे आहे आरक्षण!

Mumbai News : राज्यातील 29 महापालिकेसाठी गुरुवारी आरक्षणाची सोडत पार पडली. एकीकडे मुंबई, पुण्याचे महापौरपद कुठल्या प्रवर्गाला मिळणार? याकडे सगळ्यांच लक्ष लागले होते. त्यातच गुरुवारी सोडत जाहीर करण्यात आली. त्यानुसार मराठवाड्यात महिलाराज दिसत आहे. मराठवाड्यातील छत्रपती संभाजीनगर, जालना, परभणी, नांदेड व लातूर महापालिकेचे आरक्षण जाहीर झाले आहे.

आरक्षण सोडतीप्रमाणे छत्रपती संभाजीनगरमध्ये सर्वसाधारण महापौर होणार असल्याचे पुढे आले आहे. तर दुसरीकडे जालना, लातूर महापालिका या अनुसूचित जातीच्या महिलेसाठी आरक्षित असल्याचे पुढे आले आहे. विशेष म्हणजे जालना महापालिका अस्तित्वात आल्यानंतर या ठिकाणी पहिल्यांदाच निवडणूक होत आहे. विशेष म्हणजे जालना महापालिकेत पहिल्यांदाच महिलाराज असणार आहे.

नांदेड महापालिकेचे आरक्षणपद हे सर्वसाधारण महिलेसाठी आरक्षित ठेवले आहे. त्यामुळे आता नांदेड महापालिकेसाठी आता मोठी चुरस पाहवयास मिळणार आहे. याठिकाणी भाजपचे पूर्ण बहुमत आहे, त्यामुळे आता याठिकाणी महापौर काळ होणार याची उत्सुकता शिगेला पोहचली आहे.

परभणी महापालिकेचे महापौर पद सर्वसाधारण (खुला) आहे. यापूर्वी तीन वेळा परभणीचे महापौर पद महिलेसाठीच आरक्षित असल्याने त्याठिकाणी आरक्षण सोडतीनंतर परभणीतील काँग्रेस व ठाकरेंच्या शिवसेनेने आक्षेप नोंदवला. त्यावर संपूर्ण आरक्षण सोडत जाहीर झाल्यानंतर त्याबाबत योग्य निर्णय घेतला जाईल, असे नगरविकास मंत्री माधुरी मिसाळ यांनी स्पष्ट केले. त्यामुळे सोडत पार पडल्यानंतर परभणीबाबत काय निर्णय घेतला जाणार याकडे सर्वांचे लक्ष लागले आहे.

मराठवाड्यातील आरक्षण पुढीलप्रमाणे :

छत्रपती संभाजीनगर : सर्वसाधारण (खुला)

नांदेड-वाघळा : सर्वसाधारण महिला

लातूर : अनुसूचित जाती महिला

परभणी: सर्वसाधारण (खुला)

जालना : अनुसूचित जाती महिला