Dhananjay Munde : संतोष देशमुख हत्येवरुन वातावरण तापलेलं असतानाच धनंजय मुंडे अन् सीएम फडणवीसांमध्ये बैठक, काय आहे कारण?

Mumbai News : बीड जिल्ह्यातील मसाजोग गावचे सरपंच संतोष देशमुख यांच्या हत्येप्रकरणी राष्ट्रवादीचे नेते आणि अन्न पुरवठा मंत्री धनंजय मुंडे यांच्या अडचणी वाढल्या आहेत. या हत्याकांडाच्या निषेधार्थ शनिवारी सर्वपक्षीय नेत्यांनी बीडमध्ये महामोर्चा काढल्याने महाराष्ट्राचे राजकारण तापले असून महायुती सरकारवर प्रचंड दबाव आला आहे. त्यामुळे धनंजय मुंडे यांचे मंत्रीपदही धोक्यात आले आहे.अशातच मुख्यमंत्री देवेंद्र फडणवीस आणि धनंजय मुंडे यांची भेट झाली असल्याचे बोले जात आहेत. 

९ डिसेंबर रोजी देशमुख यांचे अपहरण करून हत्या करण्यात आली होती. याप्रकरणी पोलिसांनी चार आरोपींना अटक केली आहे. दरम्यान, तीन आरोपी फरार आहेत. वाल्मिकी कराड हा देशमुख खून प्रकरणाचा सूत्रधार असल्याचे बोलले जात आहे.  वाल्मिकी कराड हा धनंजय मुंडे यांचा निकटवर्तीय असल्याचे सांगितले जात आहे. 

दरम्यान सरपंच हत्या प्रकरणाची गंभीर दखल घेत मुख्यमंत्री देवेंद्र फडणवीस यांनी सीआयडीला आरोपींची मालमत्ता जप्त करण्याचे निर्देश दिले आहेत.अशातच आज सह्याद्री अतिथीगृह येथे मुख्यमंत्री देवेंद्र फडणवीस यांनी विविध पाच खात्यांच्या सचिवांची बैठक बोलावली होती. या बैठकीला मंत्र्यांना निमंत्रण नसताना देखील मंत्री धनंजय मुंडे बैठकीला दाखल झाल्याने उलटसुलटं चर्चांना उधाण आलं आहे.

मुख्यमंत्र्यानी विविध पाच खात्यांच्या आगामी १०० दिवसांच्या रोड मॅपचा आढावा घेण्यासाठी अधिकाऱ्यांची बैठक बोलावली होती. हि बैठक सचिवांन पुरतीच मर्यादित होती.  या बैठकीत संबंधित खात्यांचे मंत्री उपस्थित राहणार नव्हते.

तरी देखील धनंजय मुंडे हेदेखील मुख्यमंत्री देवेंद्र फडणवीस यांच्या एंट्रीनंतर काही वेळातच सह्याद्री अतिथीगृहावर दाखल झाल्याने या दोन्ही नेत्यांमध्ये बीड बाबत चर्चा झाली असण्याची शक्यता वर्तवली जात आहे. त्यामुळे या प्रकरणात आणखी काय घडामोडी घडतात हे पाहणे औतुक्याचे ठरणार आहे.