Sangram Jagtap Death Threat : आमदार संग्राम जगताप यांना जीवे मारण्याची धमकी देणाऱ्याला अटक, हैद्राबादमध्ये मुसक्या आवळल्या!

Sangram Jagtap Death Threat News : राष्ट्रवादी काँग्रेसचे आमदार संग्राम जगताप यांना जीवे मारण्याची धमकी मिळाल्याने खळबळ उडाली होती. या प्रकरणी फिर्याद देण्यात आली होती. बुधवारी रात्री आमदार जगताप यांचे स्वीय सहाय्यक सुहास शिरसाठ यांच्या मोबाईलवर टेक्स मेसेज करून दोन दिवसांत संग्राम जगताप यांना मारणार, अशी धमकी दिली होती. अखेर तीन दिवसानंतर पोलिसांना जीवे मारण्याची धमकी देणाऱ्याला अटक करण्यात यश आले आहे. या प्रकरणी अहिल्यानगरमधील कोतवाली पोलिस ठाण्यात गुन्हा दाखल करण्यात आला होता.

धमकीचा मेसेज करणाऱ्याला हैद्राबाद येथून अटक करण्यात आली आहे. पण मिळालेल्या माहितीनुसार आरोपी हा मूळ बीडचा आहे. अहिल्यानगरच्या गुन्हे शाखेने हैद्राबाद येथील निजामाबाद तालुक्यातील धगगी या गावातून आरोपीला अटक केली आहे.

गुन्हे शाखेने अटक केलेल्या आरोपीचे नाव अनिस महमद हनीफ शेख असे आहे. तो मूळ बीड जिल्ह्यातील चकलांबा येथील असून सध्या तो संभाजीनगर जिल्ह्यातील नारेगाव संभाजीनगर येथे राहतो. गुन्हे शाखेच्या पथकाने त्याला हैद्राबादमधून सापळा रचून अटक केली.

विधानसभा निवडणुकीनंतर आमदार जगताप हे हिंदुत्वाच्या मुद्यावर आक्रमक झाल्याचे पाहण्यास मिळत आहेत. त्यांनी आमदार गोपीचंद पडळकर आणि आमदार महेश लांडगे यांच्या उपस्थितीमध्ये हिंदुत्ववादी संघटनांसोबत मोर्चा काढला होता.

आमदार जगताप यांची भूमिका ही राष्ट्रवादी काँग्रेसपेक्षा वेगळी असल्याची देखील चर्चा झाली होती. शनि शिंगणापूर येथे विशिष्ट समाजाच्या लोकांना विरोध करण्यात आमदार जगताप हे आघाडीवर होते.

हिंदुत्ववादी संघटनांमध्ये वाढलेली जवळीकीमुळे जगताप यांना धमकी मिळत असल्याच्या देखील चर्चा होत्या. जगताप यांच्या विरोधात आक्षेपार्ह वक्तव्य करणाऱ्या दौंडचे माजी नगराध्यक्ष बादशहा शेख यांच्या विरोधात देखील गुन्हा दाखल झाला होता.