Bidri Sugar Factory Result : दोन मंत्री, दोन खासदार, सात आजी-माजी आमदारांची प्रतिष्ठा पणाला लागलेल्या ‘बिद्री’ची मतमोजणी सुरू

Kolhapur News : कागल तालुक्यातील श्री. दूधगंगा वेदगंगा सहकारी साखर कारखान्याच्या (बिद्री) निवडणुकीच्या मतमोजणीला प्रारंभ झाला आहे. सायंकाळी पाचपर्यंत संपूर्ण निकाल हाती येण्याची शक्यता आहे. बिद्री साखर कारखान्याच्या निवडणुकीत दोन कॅबिनेट मंत्री, दोन खासदार, दोन आमदार, पाच माजी आमदार, दोन जिल्हाध्यक्ष, गोकुळचे अध्यक्ष हे एकमेकांविरोधात उभे ठाकले आहेत. त्यामुळे निकालाबाबत अवघ्या कोल्हापूर जिल्ह्याची उत्सुकता शिगेला पोहोचली आहे. (Bidri Sugar Factory election counting begins)

बिद्री सहकारी साखर कारखान्याच्या (Bidri Sugar Factory) निवडणुकीत ५६ हजार ९१ मतदारांपैकी ४९ हजार ९४० मतदारांनी आपला मतदानाचा हक्क बजावला होता. किरकोळ वादावादीचे प्रकार वगळता १७३ केंद्रावर शांततेत मतदान पार पडले होते. दोन्ही आघाडीचे ५० उमेदवार, शेतकरी संघटनेचे दोन आणि चार अपक्ष अशा ५६ उमेदवारांचे भवितव्य थोड्याच वेळात समजणार आहे. मतमोजणीला १२० टेबलवर सुरूवात झाली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, बिद्री सहकारी साखर कारखान्याच्या निवडणूक निकालाकडे कोल्हापूर जिल्ह्यातील राधानगरी, कागल, गारगोटी, करवीर तालुक्याची मिनी विधानसभा म्हणून पाहिले जात आहे. विधानसभा निवडणुकीच्या पार्श्वभूमीवर सर्वच पक्षाच्या नेत्यांनी बिद्री कारखान्याच्या निवडणुकीत ताकद पणाला लावली होती. कोल्हापूर (Kolhapur) जिल्ह्यातील नेत्यांनी ही निवडणूक अत्यंत प्रतिष्ठेची केली आहे, त्यामुळे निकालाकडे सर्वांचे लक्ष आहे.

कारखान्याचे विद्यमान अध्यक्ष के. पी. पाटील आणि आमदार प्रकाश आबिटकर यांच्यात मागील दोन महिन्यांपासून कारखाना निवडणुकीवरून जोरदार खडाजंगी सुरू होती. कोल्हापूर जिल्ह्यातील राजकारण हे नात्यागोत्याचे आणि भावकीचे राहिले आहे. त्यात के. पी. पाटील यांचे मेहुणे ए. वाय. पाटील यांनी पाटलांचे विरोधक आमदार प्रकाश आबिटकर यांना साथ दिली आहे, त्यामुळे सभासद कुणाच्या बाजून कल देतात, हे पहावे लागणार आहे.

श्री महालक्ष्मी शेतकरी विकास आघाडी विरुद्ध राजर्षी शाहू परिवर्तन विकास आघाडी असा दुरंगी सामना बिद्री साखर कारखाच्या निवडणुकीत रंगला होता. बिद्री कारखान्याच्या निकालातून विधानसभेचे चित्रही बऱ्यापैकी स्पष्ट होणार आहे, त्यामुळे विधानसभा इच्छुकांनी या कारखान्याच्या निवडणुकीत मोठी शक्ती पणाला लावली होती. कारखान्याच्या निवडणुकीत कोण वरचढ ठरणार आणि कोणाचा करेक्ट कार्यक्रम होणार, याचं उत्तरही लवकरच मिळणार आहे.