BJP News : भाजपचा निष्ठावंत ढसाढसा रडला; 3 आयात उमेदवारांपुढे हतबल; तिकीटासाठी पेट्रोल ओतून घेण्याचा इशारा

1. सोलापुरात महापालिका निवडणुकीच्या तिकिटांवरून भाजपमधील निष्ठावंत कार्यकर्त्यांमध्ये तीव्र अस्वस्थता आणि नाराजी वाढली आहे.

2. प्रभाग क्रमांक २२ मधील इच्छुक अंबादास जाधव यांनी आयारामांना तिकिट दिल्यास अन्याय होईल, असा आरोप करत भावनिक प्रतिक्रिया व्यक्त केली आहे.

3. पक्षासाठी सायकल विकून काम केल्याचा दावा करत, निष्ठावंतांना न्याय न मिळाल्यास टोकाचा निर्णय घेण्याचा इशाराही त्यांनी दिला आहे.

Solapur, 29 December : वाढत्या इनकमिंग भारतीय जनता पक्षातील निष्ठावंत अस्वस्थ झाले असून महापालिकेच्या तिकिटासाठी त्यांच्यावर अक्षरशः रडण्याची वेळ आली आहे. पक्षकार्यासाठी सायकल विकून पक्षाचे काम करणाऱ्या कार्यकर्त्याने भाजपने तिकिट न दिल्यास भाजप कार्यालयासमोर पेट्रोल ओतून पेटवून घेण्याचा इशारा दिला आहे. बायको, मुलं, मित्रं तिकिटाचं विचारतात, त्यांना मी काय सांगू, असा भावनिक प्रश्नही सोलापुरातील भाजपचे इच्छूक अंबादास जाधव यांनी केला आहे.

अंबादास जाधव हे प्रभाग क्रमांक २२ मधून इच्छूक आहेत, तर शीतल गायकवाड यांना खुद्द आमदार सुभाष देशमुख यांनी राज्याचे उच्च व तंत्र शिक्षण मंत्री चंद्रकांत पाटील यांच्या उपस्थितीत उमेदवारी जाहीर केली आहे. पण त्याच प्रभागात राष्ट्रवादीचे किसन जाधव आणि नागेश गायकवाड यांनी भाजपत प्रवेश केला आहे. त्यांना भाजपकडून उमेदवाराचा शब्द देण्यात आलेला आहे, त्यामुळे निष्ठावंतांमध्ये नाराजी दिसून येत आहे.

मी अंबादास राम जाधव गेल्या अनेक वर्षांपासून शटलमेंट भागात पहिल्यांदा भारतीय जनता पक्षाचा झेंडा घेऊन जाणारा निष्ठावंत कार्यकर्ता आहे. प्रभाग २२ मधून जर डावलून आयारामांना तिकिट दिलं तर....आज आमच्या पाठीमागे माजी पालकमंत्री विजयकुमार देशमुख, माजी सहकार मंत्री सुभाष देशमुख हे आमच्या पाठीमागं आहेत. त्यांनी म्हणतात इतर पक्षात जाऊन निवडणूक लढवा. पण आम्ही कुटुंब सोडून दुसऱ्याच्या पक्षात का जावं? असा सवाल जाधव यांनी केला आहे.

ते म्हणाले, आमच्यासारख्या निष्ठावंत आणि प्रामाणिकपणे काम करणाऱ्या कार्यकर्त्याला न्याय मिळाला नाही तर मी स्वतः एक लिटर पेट्रोल घेऊन भारतीय जनता पक्षाच्या कार्यालयासमोर जाळून घेईन. अक्षरशः जाळून घेईन, मला वैताग आलेला आहे. लोकं विचारतात हो, बायको विचारतेय, लेकरं विचारताहेत. शेजारीपाजरी, मित्र परिवार सगळे विचारतात. मग (हे सांगत असताना अंबादास जाधव यांना आश्रू अनावर झाले.) मी त्यांना जाऊन काय सांगू?

हे तुला सारखं डावलायला लागलेत. युती झाली तर आम्ही युतीचा धर्म निभावणार. आमच्या कार्यकर्त्यांनाही माहिती आहे की, त्या युतीमध्ये शिवसेना असणार. भाजप असणाार. शिवसेनेचे आम्ही अक्षरशः तीन तीन वेळा नगरसेवक निवडून आणलेला आहे. त्या नगरसेवकांनाही माहिती आहे की, आम्ही त्यांना निवडून आणलेले आहे. आता आम्हाला द्यायची वेळ आली तर नाकारलं जात आहे. आम्हाला उमेदवारीमध्ये डावललं तर अक्षरशः एक लिटर पेट्रोल घेणार आणि भारतीय जनता पक्षाच्या कार्यालयासमोर ३० डिसेंबर रोजी सायंकाळी सात वाजता जाळून घेणार, असा इशारा जाधव यांनी दिला आहे.

मी प्रभाग २२ आणि २३ मधून उमेदवारी मागितली आहे. भारतीय जनता पक्षाच्या नेत्यांनी आता निष्ठावंत कार्यकर्त्याला न्याय द्यावा. ज्यांनी पक्षासाठी काम केले आहे, त्यांना न्याय द्यावा, अशी मागणी अंबादास जाधव यांनी केला.

सायकल विकून पक्षाचे काम केले

ते म्हणाले आमच्या भावना काय सांगाव्यात. आम्ही पक्षासाठी काय केलं नाही. सर्व आमदार, खासदारांना माहिती आहे की, आम्ही पक्षासाठी काय केलं ते. नरेंद्र मोदी गुजरातचे मुख्यमंत्री होते, तेव्हा ते सोलापूरला आल्यानंतर मी त्यांच्यासोबत आठ तास होतो. माझ्याकडे फोटो आहेत. पक्ष काम करत असताना माझ्याकडे पैसे नव्हते, त्यावेळी मी सायकल विकून पक्षाचे काम केले आहे.

Q1. भाजपमधील नाराजीचे मुख्य कारण काय आहे?
निष्ठावंत कार्यकर्त्यांना डावलून नव्याने आलेल्या उमेदवारांना तिकिट दिले जाण्याची भीती हे मुख्य कारण आहे.

Q2. अंबादास जाधव कोणत्या प्रभागातून इच्छुक आहेत?
ते सोलापूर महापालिकेच्या प्रभाग क्रमांक २२ आणि २३ मधून इच्छुक आहेत.

Q3. अंबादास जाधव यांनी पक्षासाठी काय योगदान दिल्याचा दावा केला आहे?
पक्षासाठी सायकल विकून काम केले आणि अनेक वर्षे निष्ठेने भाजपचा झेंडा वाहिल्याचा दावा त्यांनी केला आहे.

Q4. त्यांनी भाजप नेतृत्वाकडे काय मागणी केली आहे?
निष्ठावंत व प्रामाणिक कार्यकर्त्यांना महापालिका निवडणुकीत न्याय्य उमेदवारी द्यावी, अशी मागणी त्यांनी केली आहे.