Mahayuti Politcs : महायुतीत ताणाताणी, 'स्थानिक' पूर्वी तुटण्याचीच अधिक शक्यता; चंद्रकांत पाटील नेत्यांच्या स्वबळाच्या भाषेवर संतापले

Mumbai News : स्थानिक स्वराज्य संस्थांच्या निवडणुकांच्या कधीही घोषणा होऊ शकतात. महायुतीमध्ये सत्तेत असलेल्या पक्षांनी स्थानिकच्या निवडणुकांना समोरे जाताना बरीच तयारी केली आहे.

महायुतीमधील नेते स्वबळाची भाषा करत आहेत. त्यामुळे महायुतीमधील वातावरण गढूळ झाले असून, स्थानिक स्वराज्य संस्थांच्या निवडणुकीत महायुती तुटण्याची शक्यता अधिक असल्याचे बोलले जात आहे. या ताणाताणीवर भाजप मंत्री चंद्रकांत पाटील यांनी महायुतीमधील नेत्यांना सुनावले आहे.

चंद्रकांत पाटील पंढरपूर दौऱ्यावर असताना, त्यांनी स्थानिक स्वराज्य संस्थांच्या निवडणुकीवर भाष्य केले. या निवडणुकांना समोरे जाताना भाजप (BJP) स्वबळावर समोरे जाणार का? या प्रश्नावर त्यांनी महायुतीमधील नेत्यांना सुनावले. महायुतीत स्वबळाची भाषा करणाऱ्यांना त्यांचे राजकारण अपरिपक्वपणा दिसतो आहे, असा टोला लगावला.

चंद्रकांत पाटील म्हणाले, "स्थानिक स्वराज्य संस्था निवडणुकीबाबत महायुतीमधील काही नेते स्वबळाचा नारा देत असतील, तर ते अपरिपक्वपणाचे लक्षण आहे. स्थानिक स्वराज्य संस्थांच्या निवडणुकीचा निर्णय सर्वोच्च न्यायालयाच्या निर्णयावर अवलंबून आहे". प्रभाग रचना आहे. शहरी निवडणुका (Election) की ग्रामीण , कोणत्या भागात कोणाची ताकद आहे. त्यावर चर्चा होईल, असे चंद्रकांत पाटील यांनी म्हटले.

'जेव्हा निवडणुका घोषित होईल, तेव्हा त्या वेळची परिस्थिती काय असेल त्यावर निर्णय होईल. खोटं बोलण्यापेक्षा खरं बोलणे योग्य आहे, असे म्हणत जे काही नेते स्वबळाचा नारा देत, असतील तर त्यांचा तो अपरिपक्वपणा आहे', असाही टोला चंद्रकांत पाटील यांनी लगावला.

महायुतीमधील एकनाथ शिंदे यांच्या शिवसेनेने स्वबळाची चाचपणी सुरू केली आहे. महायुतीत राहून एकला चलो रेची भाषणा शिवसेना खासदार नरेश म्हस्के यांनी ऐरोलीतील कार्यक्रमात बोलवून दाखवली आहे. त्यामुळे महायुतीत स्थानिक स्वराज्य संस्थांच्या निवडणुकीवरून धुसफूस रंगली आहे. या निवडणुका जाहीर होतील, त्यावेळी नेत्यांचा युती टिकवण्यासाठी कस लागणार आहे.