Solapur Politics : भाजपचे युवा नेते, माजी नगरसेवक देवेंद्र कोठेंच्या विरोधात गुन्हा दाखल

Solapur, 17 May : भारतीय जनता पक्षाचे सोलापूर लोकसभेचे उमेदवार राम सातपुते यांच्या प्रचार सभेत धार्मिक भावना दुखावणारे विधान केल्याप्रकरणी भाजपचे युवा नेते, माजी नगरसेवक देवेंद्र कोठे यांच्यावर सोलापूरमधील जेल रोड पोलिस ठाण्यात गुन्हा दाखल झाला आहे.

आमदार राम सातपुते यांच्यासाठी सोलापुरातील कर्णिक नगरच्या लिंगराज वल्याळ मैदानावर उत्तर प्रदेशचे मुख्यमंत्री योगी आदित्यनाथ यांच्या सभेचे आयोजन करण्यात आले होते. त्या सभेत देवेंद्र कोठे (Devendra Kothe) यांचे भाषण झाले होते. त्या भाषणात त्यांनी मुस्लिम धर्मियांविषयी भावना दुखावणारे विधान केले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

गोरक्षकांचे रक्षण करण्यासाठी आगामी काळात कडक कायदा निर्माण करण्यात यावा, अशी मागणी देवेंद्र कोठे यांनी केलली होती. त्या भाषणात बोलताना त्यांनी मुस्लिम धर्मियांविषयी भावना दुखावणारे विधान केले होते. तसेच, राहुल गांधी यांच्या महिलांना एक एक लाख रुपये देण्याच्या विधानाचा मुस्लिम धर्मियांशी संबंध जोडण्याचा प्रयत्न कोठे यांनी केला होता.

माजी नगरसेवक देवेंद्र कोठे यांच्या विरोधात मुस्ताक महबूब शेख यांनी जेल रोड पोलिस ठाण्यात तक्रार (Police Case) दिली होती. एक मे रोजी घडलेल्या गुन्ह्या प्रकरणी देवेंद्र कोठे यांच्यावर 17 मे रोजी गुन्हा दाखल झाला आहे.

सोलापूर लोकसभा मतदारसंघात ( Solapur Lok Sabha Constituency) भाजपकडून आमदार राम सातपुते, तर काँग्रेसकडून आमदार प्रणिती शिंदे या निवडणुकीच्या रिंगणात उतरल्या होत्या. प्रचारादरम्यान दोन्ही बाजूने आरोप-प्रत्यारोपांचा धुराळा उडाला होता. या प्रचाराच्या दरम्यानच देवेंद्र कोठे यांनी हे धार्मिक भावना दुखावणारे विधान केले होते. सोलापूर लोकसभेसाठी सात मे रोजी चुरशीने 59.19 टक्के मतदान झाले आहे. येत्या चार तारखेला मतमोजणी होणार आहे.

कोण आहेत देवेंद्र कोठे?

देवेंद्र कोठे हे सोलापूरचे माजी महापौर तथा राष्ट्रवादी काँग्रेस शरदचंद्र पवार पक्षाचे प्रमुख नेते महेश कोठे यांचे पुतणे आहेत. ते माजी नगरसेवक आहेत. लोकसभा निवडणुकीच्या प्रचारादरम्यान देवेंद्र कोठे यांनी नागपूर येथे जाऊन उपमुख्यमंत्री देवेंद्र फडणवीस यांची भेट घेतली होती. त्याचवेळी त्यांनी भाजपमध्ये प्रवेश केला होता. भाजपमध्ये प्रवेश करताच त्यांनी महाविकास आघाडीच्या उमेदवाराच्या विरोधात आक्रमक प्रचार केला आहे.