Sanjay Raut : मोठी बातमी: राऊतांचा पाय खोलात ; बार्शीत गुन्हा दाखल, अल्पवयीन मुलीचा फोटो व्हायरल करणे पडलं महागात..

Mumbai News: एका अल्पवयीन पीडीत मुलीचा फोटो टि्वट करणे ठाकरे गटाचे नेते, खासदार संजय राऊत यांना महागात पडले आहे. त्यांच्यावर गुन्हा दाखल झाल्याची माहिती समोर येत आहे.

काल (रविवारी) रात्री उशिरा हा गुन्हा दाखल करण्यात आला. राऊतांच्या टि्वटनंतर भाजपने त्यांच्यावर टीकेच्या झोड उठवली होती. चित्रा वाघ यांनी राऊतांनी तिचा फोटो का व्हायरल केला, असा प्रश्न विचारला होता

सोलापूरमधील बार्शी तालुक्यात काही दिवसापूर्वी एक धक्कादायक घटना घडली होती. एका अल्पवयीन मुलीवर अत्याचार करून तिची बोटे छाटल्याचा धक्कादायक प्रकार घडला होता. या प्रकरणी सहायक पोलीस निरीक्षक, पोलीस उपनिरीक्षक, दोन पोलीस हवालदार निलंबित झाले होते. याप्रकरणी विधान परिषदेत प्रश्नही उपस्थित करण्यात आला होता.

खासदार संजय राऊत यांनी या अत्याचाराविषयी फोटोसह १८ मार्चला ट्विट केला होता. त्यानंतर बार्शी तालुक्याचे आमदार राजेंद्र राऊत यांनी तालुक्याची बदनामी सहन केली जाणार नाही, असा इशारा नाव न घेता खासदार संजय राऊत यांना दिला. राऊतांनी संबधीत मुलीचा फोटो टि्वट केल्याने तिची ओळख समोर आल्याने त्यांच्यावर गुन्हा दाखल झाला आहे. त्यामुळे त्यांच्या अडचणी वाढण्याची शक्यता नाकारता येत आहे.

नेमक काय आहे प्रकरण

बार्शी येथे एका अल्पवयीन मुलीवर 5 मार्च रोजी अत्याचार करुन दुसऱ्या दिवशी आरोपींनी तिच्या घरात घुसून तिच्यावर हल्ला केला होता. या हल्ल्यात ती गंभीर जखमी झाली. त्यानंतर पोलिसांनी अक्षय माने, नामदेव दळवी या दोन्ही आरोपींना अटक केली. संजय राऊतांनी आरोपी मोकाट असल्याचं टि्वट करुन म्हटलं होत.

त्या मुलीचा रक्ताच्या थारोळ्यात पडलेला फोटो देखील ट्वीट केला होता. यामुळे अल्पवयीन अत्याचार पीडित मुलीची ओळख जाहीर झाली अशी तक्रार एका व्यक्तीने बार्शी पोलिसात दिली. त्या तक्रारीवरुन काल (रविवारी) रात्री उशिरा हा गुन्हा दाखल करण्यात आला.