Sangli Politics : सांगली महाविकास आघाडीत ठिणगी; आधीच काँग्रेस-शरद पवार गटात धुसफूस; आता ठाकरे गटाने तेल ओतले

Sangli Political News : सांगली जिल्ह्यात खासदार विशाल पाटील यांनी विश्वाजीत कदम यांच्या उपस्थितीत शरद पवार गटाचे प्रदेशाध्यक्ष जयंत पाटलांना विधानसभा निवडणुकीसाठी आव्हान दिले आहे. त्यामुळे महविकास आघाडीत घमासान होणार अशी शक्यता वर्तवली जात असतानाच ठाकरे गटाच्या चंद्रहार पाटील यांनीही तेल ओतले. त्यामुळे सांगलीत जागा वाटपावरून आघाडीत मोठी चुरस होण्याची शक्यता आहे. यातून वरीष्ठ मंडळी कसा मार्ग काढणार याकडे लक्ष आहे.

लोकसभा निवडणुकीनंतर राज्यात विधानसभेचे वारे वाहू लागले आहे. सांगलीत लोकसभा निवडणुकीत महाविकास आघाडीत उमेदवारीवरून बेबनाव झाला होता. आता विधानसभेच्या पार्श्वभूमीवरही आता काँग्रेस आणि राष्ट्रवादी काँग्रेस शरदचंद्र पावर पक्षात वाद हेवेदावे सुरू झाले आहेत. त्यातच ठाकरे गटानेही आघाडीत नवे आव्हान उभे केले आहे. त्यामुळे सांगलीत जागा वाटप करताना महाविकास आघाडीतील ज्येष्ठ नेत्यांची मोठी पंचायत होण्याची शक्यता आहे.

विशाल पाटील Vishal Patil यांनी शरद पवार गटाचे प्रदेशाध्यक्ष जयंत पाटील यांच्या इस्लामपूर-वाळवा विधानसभा मतदारसंघाकडे आपले विशेष लक्ष असल्याचे विधान केले. त्याच स्टेजवर विश्वजीत कदम यांनीही जयंत पाटील यांना इशारा दिला आहे. परिणामी सांगलीतील विधानसभांच्या जागांवरुन काँग्रेस आणि शरद पवार गटात वादाची ठिणगी पडल्याचे बोलले जाते. त्यात आता चंद्रहार पाटलांनीही दोन जागांवर दावा सांगितला आहे.

सांगली लोकसभा निवडणुकीतील ठाकरे गटाचे उमेदवार चंद्रहार पाटील Chandrahar Patil यांनी विधानसभेत दोन जागा लढवणारच, अशी ठाम भूमिका मांडली आहे. खानापूर-मिरज विधानसभा मतदारसंघ शिवसेना ठाकरे गट लढवणारच, असे त्यांनी स्पष्ट करून महाविकास आघाडीत नव्याने आव्हान निर्माण केले आहे.

चंद्रहार पाटलांनी काँग्रेसला इशाराही दिला आहे. राज्यात उद्धव ठाकरे यांच्या प्रामाणिक कष्टामुळे काँग्रेसला एका जागेवरून थेट 13 खासदारांवर नेले आहे. तर शरद पवार गटाच्या ४ वरून 8 जागा निवडून आल्या आहेत. सांगलीत मात्र काँग्रेस आणि राष्ट्रवादीने गद्दारी केली. आता विधानसभेतही पुन्हा गद्दारी कराल तर राज्यात किंमत मोजावी लागेल, असा थेट इशारा चंद्रहार पाटील यांनी दिला.

(Edited by Sunil Dhumal)