देगलूरमध्ये पराभवानंतरही चंद्रकांतदादा म्हणतात `आता आता मध्यावधी निवडणूक घ्याच!`

कोल्हापूर : आता असा कोणताही गुन्हा उरला नाही, ज्याचा आरोप महाविकास आघाडी सरकारमधील मंत्र्यावर नाही. सरकारमधील एका मंत्र्याला भ्रष्टाचारामुळे अटक झाली. एका मंत्र्याच्या नातेवाईकांकडे बाराशे कोटींची मालमत्ता मिळाली. अमली पदार्थांबाबत एका मंत्र्याच्या नातेवाईकावर कारवाई झाली. तर, एका मंत्र्याच्या जावयाचे पंधराशे कोटीचे कंत्राट रद्द झाले आहे. आतातरी मुख्यमंत्र्यांनी नैतिकतेला धरून आपला राजीनामा देत, मध्यावधी निवडणुकीला सामोरे गेले पाहिजे, अशी मागणी भाजपचे प्रदेशाध्यक्ष चंद्रकांत पाटील (Chandrakant Patil) यांनी आज (ता.2 ऩोव्हेंबर) पत्रकार परिषदेत केली आहे.

चंद्रकांत पाटील म्हणाले, 'सर्व कायदेशीर पर्याय संपल्याने माजी गृहमंत्री अनिल देशमुख (Anil Deshmukh) यांना तपास यंत्रणांना सामोरे जावे लागले आहे. त्यामुळे त्यांना मध्यरात्री अटक झाली. आता असा कोणताही गुन्हा उरला नाही, ज्याचा आरोप महाविकास आघाडी सरकारमधील मंत्र्यावर नाही. असा घणाघात पाटील यांनी राज्य सरकारवर केला आहे.

पाटील म्हणाले, राजकारणातील नैतिकता महाविकास आघाडी सरकारने धुळीस मिळवली आहे. राज्यातील कायदा सुव्यवस्था धोक्यात आहे. या सर्व गोष्टी पाहता मुख्यमंत्री उद्धव ठाकरे यांनी नैतिकतेला धरून राजीनामा दिला पाहिजे व मध्यावधी निवडणुकीस सामोरे गेले पाहिजे. अशी मागणी पाटील त्यांनी केली आहे.

अजित पवार आयता पैसा सोडायला तयार नाहीत

पेट्रोल, डिझेलच्या वाढत्या किंमतीवरून राज्यातील जनता हैराण झाले आहेत. मात्र, दर कमी होण्यासाठी राज्याने आपले कर कमी केले तर पेट्रोल, डिझेल दर कमी होईल. पण अजित पवार इंधनाच्या करातून मिळणारा आयता पैसा सोडायला तयार नाहीत, असे म्हणत, पाटील यांनी पेट्रोल, डिझेल दराबद्दल राज्य सरकारलाच जबाबदार धरले आहे.