Maan : इंडस्ट्रीयल कॉरिडॉरसाठी नागरीक आक्रमक; म्हसवडला रविवारी आक्रोश मोर्चा...

म्हसवड : माण तालुक्यातील म्हसवड, मासाळवाडी, धुळदेव व माळशिरस तालुक्यातील गारवड येथे केंद्र सरकारच्या बंगळूर-मुंबई इकोनॉमिक इंडस्ट्रीयल कॉरिडॉरचे काम रेंगाळले आहे. त्यामुळे ते तातडीने पूर्ण करावे, या मागणीसाठी सातारा, सोलापूर व सांगली जिल्ह्यातील नागरिक म्हसवडला येत्या रविवारी सर्व पक्षीय आक्रोश मोर्चा काढून 'रास्ता रोको' आंदोलन करणार आहेत, अशी माहिती माण देश म्हसवड कॉरिडॉर बचाव संघर्ष समितीचे धनंजय ओंबासे व कृष्णा खोरे पाणी संघर्ष समितीचे डॉ. महादेव कापसे, दिलीप तुपे यांनी दिली आहे.

यासंदर्भात श्री. ओंबासे, डॉ. कापसे, श्री. पुते म्हणाले, नियोजित बंगळूर-मुंबई आर्थिक कॉरिडॉर म्हसवडला होणे माणदेशासाठी महत्त्‍वाचे आहे. त्यासाठी संघर्ष समिती करत असलेल्या संघर्षाला माणदेशातील युवकांसह सामान्य जनतेने साथ देण्याची आवश्यकता आहे. माणदेशाच्या भवितव्यासाठी माणदेशातील सर्वच पक्षांच्या लोकप्रतिनिधी, नेत्यांनी मतभेद विसरून कॉरिडॉर म्हसवडलाच होण्यासाठी संघर्ष समितीसोबत मैदानात उतरण्याची गरज आहे.

यासाठी संघर्ष समितीसमवेत खासदार रणजितसिंह नाईक-निंबाळकर, माजी मंत्री महादेव जानकर, आमदार जयकुमार गोरे, राष्ट्रवादीचे नेते प्रभाकर देशमुख, शिवसेनेचे नेते शेखर गोरे, डॉ. संदीप पोळ, अनिल देसाई, अभयसिंह जगताप आदींसह माणदेशातील सर्व पक्षिय नेतेमंडळी, सामाजिक कार्यकर्ते प्रयत्न करत आहेत.

राज्य शासनाकडून पुढील कार्यवाहीचे आदेश तातडीने व्हावेत या मागणीसाठी रविवारी महात्मा गांधी जयंती निमित्त शांततेने म्हसवड येथे सकाळी दहा वाजता नागरिकांचा मोर्चा व रास्ता रोको आंदोलन केले जाणार आहे. या आंदोलनात नागरिकांनी मोठ्या संख्येने सहभागी होण्याचे आवाहन समितीतर्फे करण्यात आले आहे.