Pune News : उपमुख्यमंत्री अजित पवार यांच्या राष्ट्रवादी काँग्रेस पुणे शहराध्यक्ष दीपक मानकर यांनी पक्षाकडे राजीनामा सादर केला होता. हा राजीनामा प्रदेशाध्यक्ष सुनील तटकरे यांनी स्वीकारला आहे. यामुळे आता पुढील चार दिवसांत नव्या शहराध्यक्षाच्या नावाची घोषणा होणार असल्याची माहिती सूत्रांकडून समोर आली आहे.
मानकर यांच्यावर पोलिसांना बनावट कागदपत्र सादर केल्याचा गुन्हा दाखल झाल्यानंतर पक्षावर वाढलेल्या दबावामुळे त्यांनी राजीनामा दिला होता. त्यांनी आपल्या राजीनाम्यात, “माझा राजकीय आलेख पाहता, काही समाजकंटक माझी बदनामी करत आहेत,” असा दावा करत नैतिकतेच्या भूमिकेतून बाजूला होण्याचा निर्णय घेतल्याचे स्पष्ट केले होते.
दरम्यान, आगामी महापालिका निवडणुकीच्या तोंडावर असताना शहराध्यक्षपदासाठी नव्या चेहऱ्याची निवड ही राष्ट्रवादीसाठी मोठे आव्हान ठरणार आहे. मुंबईत नुकत्याच झालेल्या पक्षाच्या वरिष्ठांच्या बैठकीत नव्या शहराध्यक्षपदासाठी काही नावांची चर्चा झालीय. त्यात आमदार चेतन तुपे, माजी आमदार सुनील टिंगरे, माजी महापौर दत्ता धनकवडे, माजी सभागृह नेते सुभाष जगताप आणि कार्याध्यक्ष प्रदीप देशमुख यांची नावे आघाडीवर आहेत.
राष्ट्रवादीकडून विचाराधीन असलेल्या नावांमध्ये महापालिकेमध्ये विरोधी पक्ष नेते राहिलेले तसेच दुसऱ्यांदा हडपसर मधून आमदार झालेले चेतन तुपे यांचं शहराध्यक्ष पदासाठी नाव आघाडीवरती आहे. मात्र शहरातील एकमेव आमदाराकडे दादा शहराचे नेतृत्व देणार का? हे पाहणं महत्त्वाचं ठरणार आहे.
तसेच वडगाव शेरीचे माजी आमदार आणि अजित पवारांचे निकटवर्ती असलेले सुनील टिंगरे शहराध्यक्ष पदाच्या रेसमध्ये असल्याचं बोललं जात आहे. माजी महापौर दत्ता धनकवडे आणि माजी सभागृह नेते असलेल्या सुभाष जगताप यांच्या नावाची चर्चा देखील शहराध्यक्ष पदासाठी सुरू असल्याचं बोललं जात आहे. याआधी अनेकदा शहराध्यक्ष पदासाठी सुभाष जगताप यांचेही नाव चर्चेत होतं. मात्र त्यांना संधी मिळालेली नाही. त्यामुळे यंदा त्यांना संधी मिळण्याची दाट शक्यता वर्तवली जातेय.
आगामी महापालिका निवडणुकीच्या पार्श्वभूमीवर शहराध्यक्ष पदासाठी नाव निवडणे अजित पवार यांच्यासह राष्ट्रवादीसाठी अत्यंत कठीण जाणारे आहे. अनेक समीकरणांचा विचार करून हे नाव निवडलं जाणार असल्याचं सांगितलं जात आहे. पुढील चार दिवसांमध्ये रिक्त झालेल्या शहराध्यक्षाच्या नावाची घोषणा होण्याची शक्यता आहे. तर चर्चेत असणाऱ्या कोणत्या नावावर शिक्कामोर्तब होतो हे देखील आता पाहावं लागणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.