Sangli Loksabha Election : सांगली लोकसभेत डबल महाराष्ट्र केसरीने ठोकला शड्डू; चंद्रहार पाटलांची घोषणा

Sangli Political News : आगामी लोकसभेच्या तोंडावर सर्वच राजकीय पक्षांनी शड्डू ठोकला असताना आता डबल महाराष्ट्र केसरी चंद्रहार पाटीलदेखील मैदानात उतरले आहेत, पण या वेळी ते कुस्तीच्या नव्हे तर निवडणुकीच्या मैदानात उतरून पाटील यांनी शड्डू ठोकला आहे. चंद्रहार पाटील यांनी स्वतः सांगली लोकसभा मतदारसंघाच्या आखाड्यात उतरणार असल्याची घोषणा केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

लोकसभेची निवडणूक लढवण्यासाठी सर्वच पक्षांकडून मला ऑफर्स येत आहेत, तर मी ही लोकसभा लढवण्याच्या दृष्टीने तयारी करत आहे, असे सांगत चंद्रहार पाटील यांनी सांगलीच्या आखाड्यात लांघ बांधून तयार असल्याचे दाखवून दिले आहे. मी लोकसभा लढवावी, अशी जिल्ह्यातील अनेकांची इच्छा आहे. मीही लोकसभा लढण्यास तयार आहे. दरम्यान, आगामी निवडणुकांच्या पार्श्वभूमीवर त्यांनी सांगली जिल्ह्यातील विट्यासह अनेक ग्रामीण भागात दौरेही केले आहेत. हे दौरे करतानी लोकांच्या भावनाही जाणून घेत आहेत.

...तर सांगलीत तीन पाटलांमध्ये लढत

सांगली लोकसभा मतदारसंघांमध्ये दोन पाटलांमध्ये लढत होणार असल्याची चर्चा होती. काँग्रेसकडून विशाल पाटील आणि भाजपकडून संजय पाटील हे रिंगणात उतरणार असल्याची चर्चा आहे, तर पृथ्वीराज देशमुख यांनीदेखील भाजपच्या उमेदवारीवर दावा केला आहे. त्यात चंद्रहार पाटील यांनीही आपल्या उमेदवारीची घोषणा केल्यानंतर आता तीन पाटलांची निवडणुकीच्या आखाड्यात लढत होणार का, अशीही सांगतील चर्चा सुरू झाली आहे.

Edited By- Anuradha Dhawade