सोलापूरचा लाचखोर शिक्षणाधिकारी किरण लोहार अखेर निलंबित

सोलापूर : प्राथमिक शिक्षणाधिकारी डॉ. किरण लोहार (Kiran Lohar) यांना 31 ऑक्टोबर रोजी 25 हजारांची लाच घेताना लाचलुचपत प्रतिबंधक विभागाने रंगेहाथ पकडले होते. त्यानंतर 3 नोव्हेंबर रोजी लाचलुचपत विभागाकडून अहवाल प्राप्त होताच तातडीने जिल्हा परिषद प्रशासनाने अवर सचिव शालेय शिक्षण व क्रीडा विभाग मुंबई, आयुक्त शिक्षण विभाग (Education Department) पुणे व संचालक शिक्षण विभाग पुणे या कार्यालयांना लोहार यांच्यावर कारवाईसाठी अहवाल पाठवला होता.

त्यानुसार राज्य शासनाकडून 7 नोव्हेंबर रोजी शालेय शिक्षण व क्रीडा विभागाने आदेशानुसार लोहार यांना निलंबित केले आहे. निलंबन आदेशानुसार किरण लोहार, शिक्षणाधिकारी (प्राथमिक) (गट-अ), जि. प. सोलापूर (Solapur) यांना अटकेच्या दिनांकापासून निलंबित करण्यात आले आहे, असे म्हटले आहे. तसेच पुढील आदेश होईपर्यंत ते निलंबित राहतील.

त्याचप्रमाणे निलंबन कालावधीत लोहार यांचे मुख्यालय सोलापूर ठेवण्यात आले आहे. त्यांना या कालावधीत मुख्यालय सोडता येणार नाही, असेही निलंबन आदेशात नमूद करण्यात आले आहे. किरण लोहार यांनी रत्नागिरी, कोल्हापूर आणि सोलापुरात शिक्षणाधिकारी म्हणून काम पाहिले आहे. या तीनही ठिकाणी ते वाद्‌ग्रस्त राहिले आहेत.

सोलापुरात पंचवीस हजार रुपयांची लाच घेताना ते लाचलुचपत प्रतिबंधक विभागाच्या जाळ्यात अडकले आहेत. लोहार हे मूळचे कोल्हापूरचे आहेत. कोल्हापूरमधील शिक्षक कॉलनीमध्ये त्यांचे घर आहे. त्या घराची कोल्हापूर लाचलुचपत प्रतिबंधक विभागाने तपासणी केली होती.