Sangli-Satara MLC : शिंदे-देसाई यांच्यात बंदखोलीत तासभर चर्चा; भाजपकडून डावलले जात असल्याने शिवसेना-राष्ट्रवादी नाराज

Satara, 13 June : सांगली-सातारा विधान परिषदेच्या निवडणुकीची रणधुमाळी सध्या जोरात सुरू आहे; परंतु यामध्ये महायुतीत सर्वकाही आलबेल झाल्याचे अजूनही दिसून येत नाही. महायुतीचे घटक पक्ष राष्ट्रवादी काँग्रेस आणि शिवसेना कुठेतरी नाराज असल्याची जोरदार चर्चा सुरू होती. या चर्चेला अखेर आज (ता. १३ जून) पालकमंत्री शंभूराज देसाई यांच्या विधानानंतर बळ मिळाले आहे.

पालकमंत्री देसाई हे आज उपमुख्यमंत्री एकनाथ शिंदे यांची भेट घेण्यासाठी दरे गावी आले होते. त्या वेळी या दोघांमध्ये जवळपास एक तास बंद खोलीत चर्चा झाली. या चर्चेनंतर पत्रकारांशी बोलत असताना मंत्री देसाई यांनी भाजपच्या सध्याच्या भूमिकेवर तीव्र नाराजी व्यक्त केली. विधान परिषदेच्या निवडणुकीच्या अनुषंगाने कोणत्याही बैठकांना शिवसेनेला विचारात घेतले जात नसल्याचे त्यांनी बोलून दाखवले.

मंत्री देसाई म्हणाले, ‘‘सध्याच्या विधान परिषदेच्या निवडणुकीमध्ये आमची अवस्था ‘येऊ नको, तर कोणत्या गाडीत बसू’, अशी झालेली आहे. आम्हाला जर कोणत्याही बैठकीचे निमंत्रणच नाही, तर आम्ही मग कोणत्या गाडीत बसायचे’’, असा खोचक सवालही त्यांनी केला.

आता याच पार्श्वभूमीवर आयोजित महायुतीच्या बैठकीला पालकमंत्री शंभूराज देसाई आणि मदत व पुनवर्सन मंत्री मकरंद पाटील हे अनुपस्थित राहणार असल्याची माहिती आहे.

सातारा झेडपी निवडणुकीत मतभेद अन् मनभेद

सातारा जिल्हा परिषद निवडणुकीपूर्वी साताऱ्यातील महायुतीत उभी फूट पडली होती. भाजपने सतत डावलले असल्याचे म्हणत राष्ट्रवादी आणि शिवसेनेने स्वतंत्र निवडणूक लढवली होती. निकालानंतरही राष्ट्रवादी आणि शिवसेना युतीकडे स्पष्ट बहुमत होते.

भाजपकडे सर्वाधिक जागा होत्या. मात्र, बहुमताचा आकडा त्यांच्याकडे नव्हता. त्याचवेळी भाजपने शिवसेना आणि राष्ट्रवादीचे सदस्य फोडून जिल्हा परिषदेत सत्ता स्थापन केली होती. या राड्यानंतर महायुतीतील नेत्यांमध्ये मतभेदांसह मनभेदही झाले होते.