Karad News : आधी लगीन लोकशाहीचं; मग स्वतःचं; मतदान करूनच नवरदेव चढला बोहल्यावर....

Karad, 07 February : सातारा जिल्हा परिषद आणि पंचायत समिती निवडणुकीसाठी शनिवारी सकाळी साडेसातपासून मतदानास सुरुवात झाली. तब्बल नऊ वर्षांनंतर होत असलेल्या या निवडणुकीमुळे मतदारांमध्ये उत्साहाचे वातावरण पाहायला मिळत आहे. या मतदानाच्या दिवशी कराड तालुक्यातील तांबवे येथील एका नवरदेवाने लग्नाच्या गडबडीतही मतदानाचा हक्क बजावून आपले राष्ट्रीय कर्तव्य बजावले. या घटनेची राजकीय व सामाजिक वर्तुळात जोरदार चर्चा सुरू आहे.

तांबवे (ता. कराड) येथील बाळासाहेब दादा पाटील यांचे चिरंजीव विक्रम पाटील यांचा विवाह आज (ता. ०७ फेब्रुवारी) पुणे जिल्ह्यातील उरुळी कांचन येथे प्रकाश अर्जुन राऊळ (रा. वेर्ले, जि. सिंधुदुर्ग) यांची कन्या आदिती यांच्याशी होता. लग्नाची वेळ दुपारी ठरलेली असतानाही विक्रम यांनी सकाळी सर्वप्रथम मतदान केंद्रावर जाऊन आपला मतदानाचा (Voting) हक्क बजावला.

लग्नाची (Wedding) तयारी, पाहुण्यांची लगबग आणि वेळेची घाई असतानाही आधी मतदान, मग लग्न या भूमिकेतून त्यांनी कर्तव्याला प्राधान्य दिले. त्यांच्या समवेत कुटुंबीय व मित्रमंडळीही मतदानासाठी उपस्थित होती. मतदान केल्यानंतर थेट लग्नस्थळासाठी ते पुण्याकडे रवाना झाले.

मतदान केंद्रावर पारंपरिक पोशाखातील नवरदेव पाहून उपस्थित मतदारांमध्ये उत्सुकता निर्माण झाली. अनेकांनी त्यांचे कौतुक करत छायाचित्रेही काढली. मतदान हा लोकशाहीचा उत्सव असून प्रत्येकाने त्यात सहभागी व्हावे, असा संदेश त्यांच्या कृतीतून दिला गेल्याची प्रतिक्रिया नागरिकांनी व्यक्त केली.

विक्रम पाटील यांनी लग्नाच्या दिवशीही राष्ट्रीय कर्तव्याला प्राधान्य दिल्याने त्यांचे कौतुक होत आहे. अनेकजण घरात असूनही मतदानाकडे पाठ फिरवतात. तसेच, शासकीय सुटी असूनही मतदानासारखे राष्ट्रीय कर्तव्य बजावण्याऐवजी अनेक जण पर्यटनाला जातात, त्यांच्यासाठी विक्रम पाटील यांनी मार्ग दाखवला आहे.