Solapur News : इराणवरील हल्ल्याचा विनापरवाना निषेध करणे माजी आमदाराला भोवले; आंदोलन केल्याने 26 जणांवर गुन्हा

Solapur, 05 March : सोलापुरात विनापरवाना आंदोलन करणे माजी आमदार मार्क्सवादी कम्युनिस्ट पक्षाचे माजी आमदार नरसय्या आडम यांच्या चांगलेच अंगलट आले आहे. जमाव बंदीचा आदेशाचे उल्लघंन केल्याप्रकरणी माजी आमदार नरसय्या आडम मास्तर यांच्यासह 26 जणांवर गुन्हा दाखल करण्यात आला आहे.

माजी आमदार नरसय्या आडम (Narsayya Adam) आणि त्यांच्या सहकाऱ्यांनी बुधवारी (ता. 04 मार्च) इराणवरील लष्करी कारवाईच्या निषेधार्थ जिल्हाधिकारी कार्यालयासमोर विनापरवाना आंदोलन केले होते.

जमावबंदी आदेशाचा भंग केल्याप्रकरणी माजी आमदार आडम, अनिल अंबादास वासम, युसुफ हनीफ शेख, नसीमा घुडुभाई शेख, नलिनी छगन कलबुर्गी (सर्व रा. सोलापूर) यांच्यासह 26 जणांवर सदर बझार पोलिस ठाण्यात गुन्हा दाखल करण्यात आला आहे. याप्रकरणी सोलापुरातील (Solapur) सदर बझार पोलिस ठाण्याचे हेड कॉन्स्टेबल जाधव यांनी फिर्याद दिली होती.

सध्या अमेरिका आणि इस्त्रायलकडून इराणवर हल्ले केले जात आहेत. त्या लष्करी कारवाईच्या निषेधार्थ बुधवारी (ता. ४ मार्च) जिल्हाधिकारी कार्यालयासमोर आंदोलन करण्यास माकपने पोलिसांकडे परवानगी मागितली होती. मात्र, पोलिसांनी त्यासाठी परवानगी नाकारली होती. त्यानंतरही माकपने सकाळी ११.२० ते दुपारी तीन या वेळेत जिल्हाधिकारी कार्यालयासमोर निषेध आंदोलन केले होते.

या आंदोलनावेळी काळे झेंडे दाखवत घोषणा देण्यात आल्या होत्या. तसेच, अमेरिकेचे राष्ट्राध्यक्ष डोनाल्ड ट्र्म्प आणि इस्त्रायलचे पंतप्रधान बेंजामिन नेतान्याहू यांच्या प्रतिकात्मक पुतळ्याचे दहन करण्यात आले होते. माजी आमदार नरसय्या आडम आणि माकपचे जिल्हा सचिव युसुफ शेख यांच्या नेतृत्वात हे आंदोलन करण्यात आले.

या आंदोलनाला हिंदुत्ववादी संघटनांनी विरोध केला होता. त्यामुळे दोन्ही संघटनांचे कार्यकर्ते आमने - सामने आल्याने काही काळ तणावाचे वातावरण निर्माण झाले होते. पोलिसांनी वेळीच हस्तक्षेप केल्याने संभाव्य वाद टळला होता. माकपने विनापरवाना निषेध आंदोलन करून जमावबंदी आदेशाचा भंग केल्याने पोलिसांनी त्यांच्याविरुद्ध गुन्हा दाखल केला आहे. याप्रकरणी फौजदार साखरे तपास करीत आहेत.