Gokul Politics : गोकुळच्या निवडणुकीपूर्वी महायुतीत फूट? भाजप आमदाराकडून सतेज पाटलांसोबत युतीचे संकेत

Kolhapur News, 03 Jun : गेल्या 25 वर्षात गडहिंग्लज, चंदगड आणि आजरा भागावर अन्याय झाला आहे. त्यामुळे गडहिंग्लज विभागाला सन्मानजनक जागा न मिळाल्यास वेगळा विचार करावा लागेल. गोकुळमध्ये केवळ स्वतःचाच विचार करत असतील तर आमदार सतेज पाटील हे आम्हाला लांबचे नाहीत, असा इशारा भाजपचे घटक पक्ष आमदार शिवाजीराव पाटील यांनी महायुतीच्या नेत्यांना दिला आहे.

गडहिंग्लज विभागातील भाजप कार्यकर्ते आणि संस्था प्रतिनिधींची बैठक पार पडली या बैठकीत त्यांनी हा इशारा दिला आहे. गडहिंग्लज तालुक्यातील भडगाव येथील एका शिक्षण संकुलात ही बैठक पार पडली. यावेळी गडहिंग्लज तालुक्याच्या वाटणीला किमान पाच जागा तरी मिळाव्यात. त्यासोबत अध्यक्ष पद ही मिळावे. यासाठी आपला आग्रह असणार आहे.

गोकुळ निवडणुकीच्या निमित्ताने सर्वांनी एकत्र येऊन किमान 500 ठराव तरी गोळा करावेत. अशा सूचना आमदार शिवाजीराव पाटील यांनी दिल्या. जिल्ह्यात गोकुळच्या जीवावर अनेक जण मोठे झाले. पण दूध उत्पादक शेतकऱ्यांच्या पदरात अद्याप काही पडलेलं नाही.

त्यामुळे आपण प्रशासक पदासाठी आग्रही राहिलो. अनेक तक्रारी प्राप्त झाल्यानंतर खरं सत्य समोर येईल. यावेळी मात्र गोकुळच्या सत्तेत आपण असणार आहोत. असेही आमदार शिवाजी पाटील यांनी म्हटले आहे.

गेल्या काही दिवसांपासून आमदार शिवाजीराव पाटील यांनी मंत्री हसन मुश्रीफ मुक्त गोकुळची निवडणूक लढवू असा इशारा दिला होता. मात्र मुख्यमंत्री देवेंद्र फडणवीस यांनी महायुती म्हणून लढण्याच्या सूचना दिल्यानंतर कोल्हापुरात महायुतीच्या सर्व नेत्यांची बैठक पार पडली.

या बैठकीला आमदार शिवाजीराव पाटील यांना निमंत्रित केले नव्हते. मंत्री हसन मुश्रीफ हे महायुतीसोबत असल्याने आमदार शिवाजीराव पाटील यांनी सतेज पाटील आपल्याला लांबचे नाहीत असे विधान केल्यानंतर पुन्हा एकदा महायुतीमध्ये वादाची ठिणगी पडली आहे.