Kolhapur : 'गोकुळ'वर कब्जासाठी मुश्रीफांचा गुरुवारी 'पॉवर शो' : शिवसेना, भाजपही एकाचवेळी दाखवणार ताकद; सतेज पाटलांच्या डोक्यात वेगळाच प्लॅन

Gokul Election: गोकुळ दूध संघाच्या निवडणूक प्रक्रियेतील ठराव दाखल करण्याचा टप्पा टप्पा जवळ आलेला आहे. २ जुलै रोजी ठराव दाखल करण्याचा शेवटचा दिवस आहे. अशात २६ जून ते २८ जून रोजी सुट्टी असल्याने सर्वच राजकीय पक्षांमध्ये ठराव दाखल करण्याची लगबग सुरू झाली आहे. ज्याच्याकडे अधिक ठराव त्याला महायुतीत अधिकच्या जागा शिवाय विजयाचा दावेदार असं समीकरण असल्यानं सर्वच राजकीय पक्षांनी कंबर कसली आहे. त्यामुळे शक्ती प्रदर्शनाने ठराव दाखल करून गोकुळ मधील आपली ताकद दाखवण्याचा प्रयत्न राजकीय पक्षांचा आहे.

गोकुळ दूध संघाच्या निवडणुकीत ठरावाला अधिक महत्त्व आहे. गेल्या 15 दिवसांपासून संस्था सभासदांचे ठराव दाखल करण्याच्या प्रक्रियेला गती आली आहे. अशातच उद्या (२५ जून) मंत्री हसन मुश्रीफ, शिवसेनेचे घटक पक्षाचे आमदार राजेंद्र पाटील यड्रावकर यांच्या उपस्थितीत राष्ट्रवादी काँग्रेसकडून ताराबाई पार्क येथील दुग्ध निबंधक कार्यालयाकडे ठराव जमा केले जाणार आहेत. संस्था प्रतिनिधी, अनुमोदक यांनाच ठराव दाखल करताना उपस्थित राहणे बंधनकारक केले असताना महासैनिक दरबार हॉल येथे जिल्ह्यातील राष्ट्रवादी काँग्रेसचे ठरावधारक एकत्र येणार आहेत. शक्ती प्रदर्शन करत हे ठरावधारक दुग्ध निबंध कार्यालयाकडे रवाना होणार आहेत. आणि त्या ठिकाणी केवळ दोनच व्यक्तींमध्ये हे ठराव दाखल होणार आहेत.

दरम्यान २६ जून रोजी छत्रपती राजर्षी शाहू महाराज जयंती, २७ जून रोजी शनिवार आणि २८ जून रोजी रविवार असल्याने तीन दिवस सुट्टी असणार आहे. त्यामुळे २९ जूनला शिवसेनेकडून शक्तिप्रदर्शन करत ठराव दाखल केले जाणार आहेत. यावेळी पालकमंत्री प्रकाश आबिटकर, आमदार चंद्रदिप नरके, माजी खासदार संजय मंडलिक हे उपस्थित असणार आहेत. त्याचवेळी भाजपकडूनही २९ जूनला शक्तिप्रदर्शन करत ठराव दाखल होणार आहेत. यावेळी राज्यसभेचे खासदार धनंजय महाडिक, आमदार अमल महाडिक, गोकुळच्या संचालिका शोमिका महाडिक, आमदार शिवाजीराव पाटील यांची उपस्थिती असणार आहे.

तर ३० जून रोजी काँग्रेसचे आमदार सतेज पाटील यांचा गट शक्तीप्रदर्शन करत ठराव दाखल करणार आहे. वैशिष्ट म्हणजे अनेक धक्कादायक चेहरे यावेळी उपस्थित असणार आहेत.