BJP MLA NEWS : अशी आमदारकी मला नकोच, मी तिचा त्याग करेन; भाजप आमदाराचं जाहीर व्यासपीठावरून मोठं विधान

Solapur, 10 January : सोलापूर शहराला पाण्याचा दिवस म्हणजे शाप आहे, हे मी अनेकदा बोललो आहे. मी जबाबदारीने सांगतो की, सोलापूर शहराला दररोज पाणीपुरवठा केल्याशिवाय मी आमदारकीच्या निवडणुकीत मतं मागायला तुमच्या दारात येणार नाही. हा शब्द मी तुम्हाला सिद्धरामेश्वरांच्या साक्षीने देतो. मी माझ्या लोकांना दररोज पाणी देऊ शकत नसेल, तर मला अशी आमदारकी नको. मी माझ्या आमदारकीचा त्याग करेन, अशी घोषणा आमदार देवेंद्र कोठे यांनी मुख्यमंत्र्यांच्या सभेत केली.

सोलापूर महापालिका निवडणुकीतील भाजप उमेदवारांच्या प्रचारार्थ आज (ता. 10 जानेवारी) मुख्यमंत्री देवेंद्र फडणवीस यांची सभा झाली. मुख्यमंत्र्यांच्या भाषणापूर्वी आमदार देवेंद्र कोठे (Devendra Kothe) यांनी शहराला दररोज पाणीपुरवठा करण्याच्या मुद्यावर भाष्य केले.

ते म्हणाले, मी, पालकमंत्री गोरे आम्ही प्रामाणिकपणे काम करतोय. मुख्यमंत्री फडणवीस हे खंबीरपणे आमच्या पाठीशी उभे आहेत. मुख्यमंत्री फडणवीस हे सोलापूरला (Solapur) न्याय देण्याचे काम करतील, असा मला विश्वास आहे. सुमारे ८९२ कोटी रुपयांची योजना मंजूर करून सोलापूर शहराला दररोज पाणीपुरवठा केल्याशिवाय मी शांत बसणार नाही.

अनेकांनी माझ्या बोलण्यावर टीका केली, हा निवडणुका डोळ्यासमोर ठेवून बोलतो. निवडणूक स्टंट आहे. निवडणुकीची वेळ मारून नेण्यासाठी बोलतोय. पण, गेली वर्षभर मी जे बोललो आहे, ते मी मुख्यमंत्री फडणवीस यांच्याकडून करून घेण्याचा प्रयत्न केला आहे. कोठेंनी व्यथा मांडल्या. पण ही माझी व्यथा नाही, तर ही माझी भूमिका आहे, असे देवेंद्र कोठेंनी जाहीर केले.

ते म्हणाले, मी आतापर्यंत कधी बोललो नाही किंवा कोणाला माहिती नाही. पण, मुख्यमंत्र्यांच्या उपस्थितीतलं हे व्यासपीठ आहे. या व्यासपीठावरून बोलावसं वाटतं. मागील तीन महिन्यांपासून मी सत्काराचा फेटा बांधून घेतला नाही. मी संकल्प केला आहे की, जोपर्यंत मी शहरातील महिलांना दररोज पाणी देणार नाही, तोपर्यंत फेटा बांधून सत्कार स्वीकारणार नाही, हे मी तुमचा भाऊ म्हणून तुमच्या पाणीप्रश्नासाठी काम करेन, हा विश्वास मी तुम्हाला देतो.

मी मोठं बोलत नाही. माझ्या प्रभाग सातच्या जनतेला विचारा. मी २०१२ मध्ये ज्या प्रभागातून नगरसेवक झालो, त्या प्रभागात पाण्याची खूप टंचाई होती. त्या प्रभागातील पाण्याचे ७० टक्के काम केले, त्यामुळे लोक मला पाणीदार नगरसेवक म्हणायचे. तो अनुभव माझ्या पाठीशी आहे आणि मुख्यमंत्र्यांवर माझा विश्वास आहे, असेही कोठेंनी नमूद केले.

प्रणिती शिंदेंवर टीका...

एकीकडे मी भाजपचा आमदार म्हणून पाण्याची ग्यारंटी देतोय, तर दुसरीकडे काँग्रेस खासदार विकास होणार नाही; म्हणून ग्यारंटी देतात. त्यामुळे मतदारांनी काम करणाऱ्यांच्या पाठीशी उभं राहायचं की काम न करता तीन महिने, सहा महिन्यांत एखाद्या दिवशी सोलापुरात यायचं किंवा एखाद्या तालुक्यात जायचं आणि दहा लाखांच्या सभागृहाचं उद्‌घाटन करायचं आणि बोलायचं नरेंद्र मोदींवर. अशा गप्पा मारणाऱ्यांच्या पाठीशी राहायचं, अशा शब्दांत देवेंद्र कोठे यांनी नाव न घेता खासदार प्रणिती शिंदे यांच्यावर टीका केली.