Jaykumar Gore : साहेब, महापौर 100 टक्के भाजपचाच होणार, पण तेवढा संकल्प करा : पालकमंत्र्यांचे मुख्यमंत्र्यांना जाहीर साकडं

Solapur, 10 January : साहेब, सोलापूर शहर हे भारतीय जनता पक्षासोबतच आहे. शहराचा महापौर शंभर टक्के भाजपचाच होणार आहे. पण, शहराला विकासासाठी दत्तक घेण्याचा आणि पायाभूत सुविधांना आतापर्यंत दिलेले बळ यापुढेही देण्याचा संकल्प आपण करावा, अशी विनंती करतो, असे साकडे पालकमंत्री जयकुमार गोरे यांनी जाहीर व्यासपीठावरून मुख्यमंत्री देवेंद्र फडणवीस यांना घातले.

सोलापूर महापालिका निवडणुकीतील भाजप उमेदवारांच्या प्रचारार्थ मुख्यमंत्री देवेंद्र फडणवीस (Devendra Fadnavis) यांची आज (ता. 10 जानेवारी) शहरातील हरिभाई प्रशालेच्या मैदानावर जाहीर सभा झाला. त्या सभेत बोलताना पालकमंत्री फडणवीस यांनी मुख्यमंत्र्यांनी सोलापूर शहर विकासासाठी दत्तक घ्यावे, अशी विनंती केली.

जयकुमार गोरे (Jaykumar Gore) म्हणाले, मुख्यमंत्री फडणवीससाहेब, आपण सोलापूर शहराला दिलेला शब्द पाळला. विमानसेवा सुरू केली. सोलापुरातून गोवा, मुंबई विमानसेवा सुरू झाली आहे. आता सोलापूर ते तिरुपती बालाजी आणि बेंगलोर अशी विमानसेवा सुरू करावी. शहराला दररोज पाणी देण्यासाठी 863 कोटी रुपयांची योजना टेंडरमध्ये आहे. ती लवकरात लवकर पूर्ण करावी. आयटी पार्कला मंजुरी दिली आहे, आयटी पार्कचे काम लवकर चालू व्हावे, अशी आमची मागणी असणार आहे.

रोजगारासाठी सोलापूर शहरातून मोठ्या प्रमाणात इतर शहरात स्थलांतर झाले आहे. त्या विस्थापितांना पुन्हा शहरात आणण्यासाठी कुंभारी आणि अन्य एमआयडीसींचं विस्तारीकरण करावं लागणार आहे. इचलकरंजीत ज्या प्रमाणे यंत्रमागचालकांना सवलती दिल्या, तशाच सवलती सोलापूरला मिळाव्यात. तसेच यंत्रमागधारकांना विजबिलात सवलत मिळावी, अशाही मागण्या गोरे यांनी मुख्यमंंत्र्यांकडे केल्या आहेत.

जयकुमार गोरे म्हणाले, लाडकी बहीण योजनेचे श्रेय घेण्यासाठी अनेकजण पुढं येतात. पण, त्या योजनेला मुख्यमंत्री देवेंद्र फडणवीस यांनी बळ दिले आहे. सखा भाऊ वर्षातून एकदा ओवाळणी करतो, पण आमचा देवाभाऊ प्रत्येक महिन्याला ओवाळणी पाठवतो, त्यामुळे लाडक्या बहिणींनी भाजपला मदत करावी.

सोलापूर शहर भाजपसोबत आहे. शहराचा महापौर शंभर टक्के भाजपचाच होणार आहे, त्यामुळे सोलापूर शहराला विकासासाठी दत्तक घ्यावे. आपण सोलापूरसाठी केलेल्या कामाबाबत आम्ही सर्वजण तुमचे ऋणी आहोत, असेही गोरे यांनी स्पष्ट केले.