Ichalkaranji Politics : इचलकरंजी महापालिका निवडणुकीत आवाडे-हाळवणकरांची भूमिका काय असणार याकडे महाविकास आघाडीचंही लक्ष

Kolhapur News, 18 Jun : कोल्हापूर जिल्ह्यातील इचलकरंजी महानगरपालिकेची यंदा पहिलीच निवडणूक आहे. सर्वोच्च न्यायालयाने महानगरपालिका आणि जिल्हा परिषदेच्या निवडणुका घेण्याच्या सूचना दिल्यानंतर राज्य निवडणूक आयोगाकडून प्रभाग रचना करण्याची प्रक्रिया सुरू झाली आहे.

त्यामुळे आता प्रशासकीय पातळीवर हालचालींना वेग आला असून राजकीय पक्षांनी देखील हालचाली गतिमान केल्या आहेत. सध्या महायुत्ती एकत्रित लढणार असल्याचा निर्णय जिल्हा पातळीवर घेतला असला तरी इचलकरंजीतील राजकीय परिस्थिती मात्र वेगळी आहे. इचलकरंजीतील विद्यमान आमदार भाजपचे आहेत.

त्यामुळे इचलकरंजी महानगरपालिकेत सध्यातरी भाजप मोठा भाऊ असल्यामुळे भाजपकडून स्वतंत्र लढण्याचा नारा दिला जात आहे. त्यामुळे महायुतीत देखील बेबनाव होण्याची शक्यता आहे. त्यामुळे याकडे महाविकास आघाडीचे लक्ष लागून राहिले आहे.

इचलकरंजी महापालिकेच्या राजकारणात सध्या तरी महाविकास आघाडी विरुद्ध महायुती असा सामना दिसत आहे. पण भविष्य काळातील राजकारण पाहता महायुतीमधील अंतर्गत जागावाटपाचा वाद कळीचा मुद्दा ठरू शकतो. त्याचे आतापासूनच संकेत मिळत आहेत.

नुकतीच महायुतीतील वरिष्ठ नेत्यांची कोल्हापूर शासकीय विश्रामगृह येथे बैठक पार पडली. या बैठकीत आगामी स्थानिक स्वराज्य संस्थेच्या निवडणुका महायुती म्हणून लढण्याचा निर्णय झाला आहे. याच निर्णयानुसार इचलकरंजी महानगरपालिकेत महायुती म्हणूनच सामोरे जाणार का? याकडे देखील इचलकरंजीकरांचे लक्ष आहे.

सध्या इचलकरंजी महानगरपालिकेत महायुती मजबूत दिसत असली तर त्याला अंतर्गत कांगोरे अधिक आहेत. भाजपमध्ये देखील अंतर्गत वादाची ठिणगी यापूर्वी पडली आहे. माजी आमदार हाळवणकर आणि आमदार आवाडे यांच्यागटात अंतर्गत धुसफूस सुरू. त्यांच्यात जागा वाटपाचा गुंता सोडविताना पक्षीय पातळीवर मोठी कसरत करावी लागण्याची शक्यता आहे.

सध्या भाजपकडून इच्छुकांची संख्या सर्वाधिक असणार आहे, तर महायुतीतील घटक पक्ष असलेल्या शिवसेना (शिंदे गट) व राष्ट्रवादी काँग्रेस (अजित पवार गट) यांची भूमिका अद्याप स्पष्ट झालेली नाही. महायुती झाल्यास जागा वाटपाचा मोठा गुंता निर्माण होऊ शकतो.

महायुतीच्या तुलनेने महाविकास आघाडीची ताकद कमी आहे. त्यामुळे महायुतीला टक्कर देण्यासाठी महाविकास आघाडीकडून एक चिन्हाचा प्रयोग केला जाण्याची शक्यता आहे. त्यावरच सुरुवातीपासून भर देण्यात येत असल्याचे चित्र आहे. यापूर्वी नगरपालिका निवडणुकीत आवाडे विरोधक एकत्र येत शहर विकास आघाडी केली होती.