Ganesh Naik : ‘तुझ्यात हिम्मत असेल तर गणेश नाईकचा टांगा पलटी करून दाखवं’; साताऱ्यात येऊन नाईकांचे ओपन चॅलेंज

Satara, 03 February : नवी मुंबई महापालिका निवडणुकीच्या प्रचारात साताऱ्याचा मालकमंत्री आला होता. ‘आमच्या नेत्याला असं बोललात आणि परवानगी दिली तर मी तुमचा टांगा पलटी करेन’ असं म्हणाला होता. ‘मी तुला परवानगी देतो, तुझ्यात हिम्मत असेल तर गणेश नाईकचा टांगा पलटी करून दाखवं,’ असे ओपन चॅलेंज वनमंत्री गणेश नाईक यांनी सातारचे पालकमंत्री शंभूराज देसाई यांना दिले.

सातारा जिल्हा परिषद आणि पाटण पंचायत समितीच्या निवडणुकीत भाजप उमेदवाराच्या प्रचारार्थ आयोजित सभेत गणेश नाईक (Ganesh Naik) बोलत होते. ते म्हणाले, ज्यांचे हात साफ असतात, तोच जनता दरबार घेऊ शकतो. ज्याला पाकीट आणि हप्ते मिळतात, तो जनता दरबार घेऊ शकत नाही.

राज्यातील २९ महापालिका निवडणुकीपैकी नवी मुंबईत जिद्दीच्या आणि ताकदीच्या निवडणुका झाल्या. सगळे हरामाचे पैसे नव्या मुंबईच्या जनतेने ठोकरले. पाटणची (Patan) जनताही नवी मुंबईच्या जनतेप्रमाणे स्वाभिमानी असून हरामाच्या पैशाला हात लावणार नाही. तो मालकमंत्री पाच वर्षे दारु खात्याचा मंत्री होता. मी दहा वर्षे होतो. मी सीनियर आहे ना? पण आम्ही कुणाची चपटी बाटलीही घेतली नाही. कुठल्याही हरीच्या लालने सांगावे की, गणेश नाईकांनी तुमचं पाणी तरी मागितलं आहे का? त्याच्याविषयी लोक काय बोलतात, हेही एकदा ऐकून घ्या, असे आवाहन गणेश नाईक यांनी केले.

ते म्हणाले, इथल्या जनतेला मी आवाहन करेन. प्रामुख्याने डी. आर. पाटील, तिकडचे सर्व मतदार बस भरून घेऊन या. सत्यजित पाटणकर यांच्या एकतरी जाहीर सभेला मी येणार आहे. आगामी विधानसभा निवडणुकीत सत्यजित पाटणकर हे आमदार होतील, असा मला विश्वास आहे. मला ओळखणारे प्रत्येक गावात आहेत, त्यांनी जनता दरबारात पत्र द्यावे किंवा इथून पत्र पाठविले तरी मी काम करेन. तिथं यायची गरज नाही.

दादागिरी कोणाची खपवून घ्यायची नाही. ती दादागिरी मोडण्याची ताकद आमच्यात आहे. गुंडा पुंडांचं राजकारण दुसऱ्याला शिकवा. तावरी गावात उमेदवाराला जाऊ दिलं जात नाही. पोलिसांनी उमेदवाराला घेऊन तावरीत जावं. हात लावला तर हा गणेश नाईक बघतो, हे त्या मालकमंत्र्यालच माझं आव्हान आहे, असे चॅलेंजच त्यांनी देसाईंना दिले.

ते म्हणाले, लोकशाहीत प्रेमानं वागावं, मत घ्यावीत आणि मोठं व्हावं पण लोकांची मुस्कटदाबी, गुंडागर्दी करून राजकारण करू नका. हा गणेश नाईक कधी कुणाला घाबरला नाही. आम्ही गुंडागर्दी कधी केली नाही, कुणाला करू देत नाही.

‘पाटण तालुका गणेश नाईक दत्तक घेतो’

दोन वर्षांपूवी आपल्या माणसाला ब्लेड मारली म्हणे. आता भाजप कार्यकर्त्याला नुसती टाचणी लावून बघा म्हणावं. जयकुमार गोरे हे सोलापूरचे पालकमंत्री आहेत. पण ह्या पाटण तालुक्याला गणेश नाईक यांनी आजपासून दत्तक घेतले. तुम्ही निर्धास्तपणे मतदान करा आणि आपल्या सात लेकांना निवडून द्या. पैशाचं वाटप होत असेल तर तिथंच आडवा. मी जिल्हा पोलिस अधीक्षकांनाही बोलतो. आमच्याकडे हरामाचा पैसा नाही, त्यामुळे आम्ही पैसा वाटू शकत नाही. आम्ही प्रेम वाटू, असेही नाईकांनी स्पष्ट केले.