Kolhapur Politics : कोल्हापूरच्या हद्दवाढीचा वाद कोणाची ‘वाढ’ रोखणार? थेट मतदानावर बहिष्काराचा इशारा  

Kolhapur Municipal Election : गेल्या अनेक वर्षांपासून कोल्हापूर शहराची हद्दवाढ व्हावी, यासाठी लढा सुरू आहे. मात्र ग्रामीण भागातील नागरिकांच्या विरोधानंतर कोल्हापूर शहराच्या हद्दवाडीवरून ग्रामीण आणि शहरी असे दोन मतप्रवाह निर्माण झालेत. त्यामुळे राज्य सरकारकडून प्राधिकरणाचा मुद्दा समोर आला आहे. शहरालगत असणाऱ्या 42 गावांचा प्राधिकरणामध्ये समावेश करून विकासाला चालना देण्याचा प्रयत्न सुरू आहे.

महानगरपालिकेकडून 42 गावांचा समावेश प्राधिकरणात करण्यात यावा, असा प्रस्ताव राज्य सरकारला पाठवला आहे. मात्र आता शहराच्या हद्दवाढीचा मुद्दा ऐन महानगरपालिका निवडणुकीच्या तोंडावर तापण्याची शक्यता आहे. कोल्हापूर शहर कृती समितीकडून शहराची हद्द वाढ व्हावी, अशी भूमिका ठाम सांगण्यात येत आहे. सरकारने शहराची हद्दवाढ करण्याची भूमिका केवळ निवडणुकीपूर्तीच केल्याने आता कृती समिती आक्रमक झाली आहे.

नगरपालिकेची स्थापना झाल्यापासून एक इंचही हद्दवाढ झाली नसल्याचा आक्षेप कृती समितीने करत 42 गावांच्या प्राधिकरण प्रस्तावाला विरोध केला आहे. त्यामुळे आगामी महानगरपालिका निवडणुकीत कृती समितीने मतदानावर बहिष्कार टाकण्याचा इशारा दिला आहे. 

आठ गावात हद्दवाढ होणार?

दरम्यान, कोल्हापूर उत्तर विधानसभा मतदारसंघाचे आमदार राज्य नियोजन मंडळाचे अध्यक्ष राजेश क्षीरसागर यांनी सुरुवातीपासूनच शहराची हद्दवाढ व्हावी, अशी मागणी लावून धरली आहे. मात्र कोल्हापूर दक्षिण आणि करवीर विधानसभा मतदारसंघातील आमदारांची भूमिका पाहता आमदार अमल महाडिक यांनी हद्दवाढीबाबत सूचक मौन बाळगले आहे.

आमदार चंद्रदीप नरके यांनी शहराच्या हद्दवाढीला विरोध केला आहे. त्यामुळे राज्य सरकारने 42 गावांचा प्राधिकरण प्रस्ताव तयार केल्यानंतर राज्य नियोजन मंडळाचे अध्यक्ष राजेश क्षीरसागर यांची भूमिका शहराच्या हद्दवाढ होण्याबाबत ठाम आहे. येत्या काही दिवसांत शहरालगत असणाऱ्या आठ गावांना कोल्हापूर शहराच्या हद्दवाढमध्ये घेतले जाईल, अशी भूमिका आमदार क्षीरसागर यांची आहे.