Prakash Abitkar, Hasan Mushrif sarkarnama
पश्चिम महाराष्ट्र

Kolhapur Politics : मुश्रीफांना आबिटकरांचे वावडे? 'त्या' अहवालात स्थान देणं टाळलं; पालकमंत्री पदावरून नाराजी कायम

Kolhapur Guardian Minister Post Politics : कोल्हापूर जिल्ह्याचे तत्कालीन पालकमंत्री पदावरून काँग्रेस नेते आमदार सतेज पाटील आणि वैद्यकीय शिक्षण मंत्री हसन मुश्रीफ यांच्यात चुरस पाहायला मिळाली. मंत्री मुश्रीफ यांची त्यावेळी इच्छा असताना देखील आमदार पाटील यांनी बाजी मारली.

Rahul Gadkar

Kolhapur News, 20 Aug : कोल्हापूर जिल्ह्याचे तत्कालीन पालकमंत्री पदावरून काँग्रेस नेते आमदार सतेज पाटील आणि वैद्यकीय शिक्षण मंत्री हसन मुश्रीफ यांच्यात चुरस पाहायला मिळाली. मंत्री मुश्रीफ यांची त्यावेळी इच्छा असताना देखील आमदार पाटील यांनी बाजी मारली.

त्यामुळे पालकमंत्री पदाची आस राहिलेल्या मंत्री मुश्रीफ यांना महायुती सरकारच्या काळात पालकमंत्री पद मिळाले. मात्र त्या काळातही महापूर, कोरोना काळात मंत्री मुश्रीफ आणि आमदार पाटील यांच्या स्वतंत्र बैठका पार पाडत जिल्ह्याचा पालक आपणच असल्याचं वेळोवेळी दाखवून दिले.

आता तीच स्पर्धा महायुती सरकारच्या काळात पालकमंत्री प्रकाश अबिटकर आणि मंत्री हसन मुश्रीफ यांच्यात लागल्याचे दिसून आले. महायुती सरकार विधानसभा निवडणुकीत सत्तेत आल्यानंतर पुण्यातील पालकमंत्री पदावर मंत्री मुश्रीफ यांचा दावा होता. मात्र उपमुख्यमंत्री एकनाथ शिंदे यांनी प्रकाश अबिटकर यांच्यासाठी पालकमंत्री पद खेचून आणले.

त्यामुळे मंत्री मुश्रीफ यांची नाराजी आज देखील कायम आहे. कोल्हापूर जिल्हा बँकेच्या वार्षिक अहवालात ही बाब प्रकर्षाने निदर्शनास आल्याचे दिसते. यापूर्वी जिल्हा बँकेच्या वार्षिक अहवालात जिल्ह्याच्या पालकमंत्रिपदी कोणत्याही पक्षाचे मंत्री असतील, तर त्यांचा फोटो छापला जायचा, मात्र, हे वर्ष त्याला अपवाद ठरले आहे.

जिल्‍ह्यातील मंत्री प्रकाश आबिटकर हे पालकमंत्री असूनही त्यांना अहवालात स्थान दिलेलं नाही. यावरून पालकमंत्री आबिटकर व बँकेचे अध्यक्ष हसन मुश्रीफ यांच्यातील दुरावा कायम असल्याचे पुढे आले आहे. हे दोघेही महायुतीच्या घटक पक्षाचे मंत्री असूनही पालकमंत्री पदावरून असलेल्या नाराजीचे प्रतिबिंब यातून उमटल्याचे बोलले जात आहे.

याउलट मुख्यमंत्री उपमुख्यमंत्री उच्च शिक्षण मंत्री पंतप्रधान केंद्रीय मंत्र्यांचे फोटो या अहवालात झळकले आहेत. मात्र पालकमंत्र्यांचाच फोटो नसल्याने यांच्यातील अंतर्गत नाराजी नाट्य चव्हाट्यावर आले आहे. राज्यात महायुतीचे सरकार आल्यानंतर जिल्ह्याचे पालकमंत्री कोण होणार, याविषयी मोठी उत्सुकता होती.

ज्येष्ठतेच्या मुद्द्यावर हे पद आपल्याला मिळावे, अशी अपेक्षा मंत्री मुश्रीफ यांची होती. त्यांच्याकडूनही वारंवार तशी घोषणा केली जायची. पण, ज्या पक्षाचे आमदार जास्त त्या पक्षाला पालकमंत्री पद या निकषावर आबिटकर यांनी बाजी मारली आणि ते पालकमंत्री झाले. त्यामुळे नाराज झालेल्या मुश्रीफ यांच्याकडून या ना त्या कृतीतून आबिटकर यांच्याविषयीची नाराजी व्यक्त होत होती.

बँकेवर मुश्रीफ यांची एकहाती सत्ता आहे. ते स्वतः बँकेचे अध्यक्ष आहेत. यापूर्वी जिल्ह्याचे पालकमंत्री कोणही असो आणि ते कोणत्याही पक्षाचे असो त्यांचा फोटो बँकेच्या अहवालात छापला जायचा. 2014 रोजी राज्यात सत्तांतर होऊन भाजप-सेना युतीचे सरकार येऊन जिल्ह्याचे पालकमंत्री चंद्रकांत पाटील झाले, त्यावेळीही मंत्री पाटील यांचा फोटो अहवालात छापला होता.

पण, आता आबिटकर हे महायुतीच्याच घटक पक्षाचे मंत्री आहेत, बँकेत त्यांचे बंधू अर्जुन आबिटकर हे संचालक आहेत, तरीही त्यांचा फोटो अहवालात छापलेला नाही.सद्या अहवाल बँकेच्या ताब्यात आहेत, विकास सोसायट्यांना ते पाठवण्यात आले आहेत, त्यात तरी पालकमंत्र्यांचा फोटो दिसत नाही. यावरून महायुतीत असूनही आबिटकर-मुश्रीफ यांच्यातील दुरावा कायम असल्याचे दिसून येते.

सरकारनामाचे सदस्य व्हा

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुकट्विटरइन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.

SCROLL FOR NEXT