Kolhapur: कोल्हापूरसाठी उद्धव ठाकरेंचा नवा प्लॅन तयार : रविकिरण इंगवलेंच्या राजीनाम्यानंतर जिल्हाप्रमुखपदासाठी शोधला ताकदीचा चेहरा

Kolhapur Shiv Sena: कोल्हापुरातील शिवसेना ( उद्धव बाळासाहेब ठाकरे) पक्षाचे रविकिरण इंगवले यांनी जिल्हाप्रमुख पदाचा राजीनामा दिल्यानंतर त्या जागी कोणत्या नावावर शिक्कामोर्तब केला जाणार याकडे शिवसैनिकांचे लक्ष लागून राहिलं होते. मात्र रात्री उशिरा करवीरचे तालुकाप्रमुख विराज पाटील यांच्या नावासमोर कोल्हापूर जिल्हाप्रमुख म्हणून शिक्कामोर्तब करण्यात आले. ठाकरेंच्या शिवसेना मध्यवर्ती कार्यालयाकडून सामना मधून हे नाव प्रसिद्ध करण्यात आले आहे.

कोल्हापुरातील ठाकरेंच्या शिवसेनेमध्ये गेल्या काही दिवसांपासून अंतर्गत कलहामुळे राजकारण तापले होते. शह कटशहाचे राजकारणामुळे राज्यात ठाकरेंच्या शिवसेनेची बदनामी होत होती. कोल्हापुरातील ठाकरे शिवसेनेत पडलेले दोन गट आणि त्यातून निर्माण होणारे वाद विवाद यामुळे वरिष्ठ पदाधिकारी देखील स्थानिक पदाधिकाऱ्यांवर नाराज होते. अशातच रविकिरण इंगवले यांनी तडका फडकी जिल्हाप्रमुख पदाचा राजीनामा दिल्याने खळबळ उडाली होती.

त्यामुळे नव्याने निवड होणाऱ्या जिल्हाप्रमुख पदावर करवीरचे तालुकाप्रमुख विराज पाटील, राजू यादव, अवधूत साळुंखे इच्छुक होते. अखेर रात्री विराज पाटील यांच्या नावावर शिक्कामोर्तब करण्यात आले. विराज पाटील यांनी नुकतीच पाचगाव जिल्हा परिषद मतदार संघातून निवडणूक लढवली होती. शिवाय ते शिवसेनेचे उपनेते संजय पवार यांचे निकटवर्तीय म्हणून ओळखले जातात. ठाकरेंच्या शिवसेनेतील अंतर्गत कलह रोखने हेच मोठे आव्हान विराज पाटील यांच्यासमोर असणार आहे.

शुक्रवारी होणार होता निर्णय

दरम्यान सर्वांना विचारात घेऊन कोल्हापूर जिल्हाप्रमुख निवडीची प्रक्रिया शुक्रवारी होणार होती. त्यासाठी सर्वांना मुंबईत बोलावल्याची माहिती होती. मात्र मंगळवारी (३० जून) रात्री उशिरा त्यावर निर्णय घेण्यात आला आहे.