Local Body Elections : राजकारण आहे भावा! ‘स्थानिक’साठी शत्रूलाच मित्र करण्यासाठी धडपड

Kolhapur Politics : कोल्हापूर महानगरपालिकेच्या मागील निवडणुकीत एकमेकांच्या विरोधात ठाकलेले, राजकीय कट्टर विरोधक असलेले आता राजकीय कोंडीत सापडलेले आहेत. राज्यात झालेली महायुती आणि त्यात चार प्रभाग एकत्र होऊन एक मतदारसंघ होणार असल्याने विरोधकांच्या लोकप्रियतेचा फायदा आपल्याला होण्यासाठी राजकीय विरोधक देखील एकत्र येण्याच्या तयारीत आहेत.

गेल्या महिनाभरात कोल्हापुरातील राजकीय कट्टर विरोधकांच्या गुप्त गाठीभेटी सुरू आहेत. त्यामुळे हे राजकारण आहे भावा! आज ना उद्या आपल्याला एकत्र यावच लागणार आहे, अशी साद घालत शत्रूला देखील मित्र करण्याची धडपड इच्छुकांची सुरू आहे. मागील निवडणुकीत एक प्रभाग होता. आता मात्र चार प्रभागात इच्छुकांना धावपळ करावी लागणार आहे. नगरसेवक आणि त्यांचा प्रभाग हे समीकरण आता बदलणार आहे.

इच्छुकांनी यापूर्वी झालेल्या प्रभाग रचनेनुसार आजूबाजूच्या प्रभागात ही फिल्डींग लावली होती. मात्र, आता पुन्हा प्रभाग रचना बदलणार असल्यामुळे इच्छुकांची समीकरणे बदलली आहेत. लोकसभा निवडणुकीनंतर झालेल्या विधानसभा निवडणुकींमुळे जिल्ह्यातील राजकारण फिरले आहे. जिल्ह्यातील दहा मतदारसंघात महायुतीचेच आमदार असल्याने आगामी स्थानिक स्वराज्य संस्थेच्या निवडणुकीत देखील महायुतीला अधिक महत्त्व प्राप्त झाले आहे. अशा परिस्थितीत बहूसदस्य प्रभाग रचनेनुसार पहिल्यांदाच निवडणूक होणार असल्याने इच्छुकांची पुन्हा एकदा घालमेल वाढली आहे.

यापूर्वी काही इच्छुक एकाच मतदारसंघात संपर्क ठेवून होते. मात्र तेच इच्छुक आता आजूबाजूच्या मतदारसंघात संपर्क ठेवण्यात व्यस्त आहेत. रात्रीच्या गाठीभेटी सोबतच शत्रूंच्या गाठी देखील गुप्तपणे ठेवले आहेत. त्याच्या मतदारसंघातील फायदा आपल्याला देखील होण्यासाठी अनेकजण विरोधकांना देखील जवळ करण्याच्या तयारीत आहेत. त्या संदर्भात काही कारभाऱ्यांच्या प्राथमिक बैठका देखील झाले आहेत. सार्वजनिक मंडळांना भेटी वाढल्या.

कार्यकर्त्यांच्या घोळक्यात इच्छुकांची हजेरी वाढू लागली. मात्र, आरक्षणाच्या मुद्द्यांवरून निवडणूकच झाली नाही. त्यामुळे झालेल्या भेटीगाठी, या ना त्या कारणातून खर्च केलेला पैसा तूर्तास उपयोगाचा राहिला नाही. पुन्हा एकदा प्रभाग रचना बदलणार असल्यामुळे चार प्रभागांचा एक प्रभाग होईल, असे भौगोलिक क्षेत्र असणार आहे. त्यामुळे चौघे मिळून निवडणूक लढवावी लागणार आहे. याचाही अंदाज घेऊन इच्छुकांनी आपण इच्‍छुक असलेल्या भागातील आजूबाजूला सहकारी इच्‍छुक कोण होऊ शकते. याचाही अंदाज घेण्याचे काम सुरू केले आहे.

काही राजकीय पक्षांनी कोणकोणत्या परिसरातून निवडणूक लढवायची, यासाठी गोपनीय बैठका सुरू केल्या आहेत. प्रभाग रचना कोठूनही कोठेही झाली, तरीही त्या परिसरात आपला संपर्क पाहिजे, यासाठी इच्छुकांची धडपड सुरू झाली आहे. दरम्यान, यंदाचा गणेशोत्सव आणि दिवाळी ही मतदारांसाठी पर्वणी असणार आहे. चार मतदारसंघातील इच्छुक आपल्या दारात येणार असल्याने मतदारांची डिमांड आतापासूनच वाढली आहे. निवडणुकीला अद्याप दोन ते तीन महिने शिल्लक असल्याने तपासूनच इच्छुकांची धावपळ सुरू आहे. जवळपास 24 हजार मतदारांचा एक मतदार संघ होण्याची शक्यता आहे. त्यामुळे किमान 20 हजार मतदारापर्यंत आपण पोहोचले पाहिजे असा इरादा इच्छुकांचा आहे.