Mangalwedha News : संकेतस्थळ बंद पडले; निवडणूक आयोगाने दखल घेत उमेदवारांना दिला वेळ वाढवून

Mangalwedha Solapur News : तालुक्यातील २७ ग्रामपंचायत निवडणुकांची रणधुमाळी आजपासून सुरू झाली असताना पहिल्याच दिवशी निवडणूक आयोगाचे संकेतस्थळ बंद असल्यामुळे अनेक इच्छुकांची निराशा झाली. हे वृत्त राज्यात सर्वात आधी 'सरकारनामा'ने प्रसिद्ध केले. राज्य निवडणूक आयोगाने याची दखल घेत उमेदवारी अर्ज दाखल करण्याचा कालावधी २.३० तासाने वाढवला. मंगळवेढ्यात आज दुसऱ्या दिवशी एकच उमेदवारी अर्ज दाखल झाला.

तालुक्यातील आंधळगाव, नंदूर, लक्ष्मी दहिवडी, खुपसंगी, रड्डे, खडकी, बठाण, मुंढेवाडी, हिवरगाव, महमदाबाद हु, अकोला, शेलेवाडी, डिकसळ, जालीहाळ, लोणार, मानेवाडी, शिरसी, जंगलगी, रेवेवाडी, पडोळकरवाडी, देगाव, उचेठाण, निंबोणी, चिक्कलगी, जुनोनी, ब्रम्हपुरी, भाळवणी, तर बालाजीनगर या एकमेव ग्रामपंचायतची पोटनिवडणूक होणार आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

राज्य निवडणूक आयोगाने गेली अनेक वर्षे ग्रामपंचायती निवडणुका लांबणीवर टाकल्यामुळे अनेक इच्छुकांना मतदारांची मन धरणी करताना नाकीनऊ येऊ लागले. ऐन दिवाळीच्या तोंडावर राज्य निवडणूक आयोगाने निवडणुकीचा कार्यक्रम जाहीर केला. त्यामध्ये १६ ऑक्टोबर ते २० ऑक्टोबर या पाच दिवसांत उमेदवारी अर्ज दाखल केले जाणार आहेत.

उमेदवारी अर्ज दाखल करण्याचा कालावधी कमी असून, हे संकेतस्थळ बंद असल्यामुळे अनेक इच्छुकांची पहिल्या दिवशी निराशा झाली. याबाबतचे वृत्त सगळ्यात आधी 'सरकारनामा'ने प्रसिद्ध केले होते. सोशल मीडियातून मोठ्या प्रमाणात चर्चा झाली. याची दखल राज्य निवडणूक आयोगाने घेत उमेदवारी अर्ज दाखल करण्याचा कालावधी तोच ठेवत सकाळी ११ ते ३ हा पूर्वीचा कालावधी निश्चित केला होता. हा कालावधी २.३० तासाने वाढवून सायंकाळी साडेपाच वाजेपर्यंत निश्चित केला. तशी अधिसूचना के. सूर्यकृष्णमूर्ती उपसचिव राज्य निवडणूक आयोग यांनी प्रसिद्ध केली. दरम्यान, आज मंगळवेढ्यात २७ ग्रामपंचायतींमध्ये अकोला या ग्रामपंचायतीसाठी एकमेव उमेदवारी अर्ज दाखल करण्यात आल्याची माहिती तहसील कार्यालयातून देण्यात आली.

Edited by Sachin Fulpagare