Supriya Sule : सुप्रियाताईंच्या शेजारी बसलेल्या मुश्रीफ यांनी 'हे' धाडस केलं नाही, अबोला कायम

Kolhapur News : चरित्र ग्रंथाच्या प्रकाशन निमित्त खासदार सुप्रिया सुळे आणि वैद्यकीय शिक्षण मंत्री हसन मुश्रीफ एकत्र आले होते. दोघेही एकाच व्यासपीठावर शेजारी शेजारी बसल्यानंतरही त्यांच्यातील अबोला कायम होता. खासदार सुप्रिया सुळे यांनी देखील मुश्रीफ यांच्या सोबत बोलणे टाळले. तर मुश्रीफ यांनी देखील खासदार सुप्रिया सुळे यांच्यासोबत बोलण्याचं धाडस दाखवलं नाही. कार्यक्रम सुरुवात होऊन जवळपास तासभर उलटूनही त्यांच्यातील अबोला कायम होता.

इतिहास संशोधक डॉ. जयसिंगराव पवार लिखित मोगल मर्दिनी महाराणी ताराबाई यांच्या चरित्र ग्रंथाच्या प्रकाशन प्रसंगी जिल्ह्याचे पालकमंत्री प्रकाश आबिटकर, खासदार शाहू महाराज छत्रपती, वैद्यकीय शिक्षण मंत्री हसन मुश्रीफ, राज्यसभेचे खासदार धनंजय महाडिक, खासदार धैर्यशील माने, माजी खासदार संभाजी राजे छत्रपती, कुलगुरू डी टी शिर्के, युवराज आणि माजी आमदार मालोजीराजे छत्रपती यांची उपस्थिती होती.

या कार्यक्रमाच्या निमित्ताने जिल्ह्यातील सर्वच नेते एका व्यासपीठावर आले. मध्यभागी खासदार सुप्रिया सुळे तर त्यांच्या उजव्या बाजूला वैद्यकीय शिक्षण मंत्री हसन मुश्रीफ आणि डाव्या बाजूला खासदार शाहू महाराज छत्रपती बसले आहेत. मात्र या कार्यक्रम प्रसंगी मंत्री हसन मुश्रीफ आणि सुप्रिया सुळे यांच्यात दुरावा कायम आहे.

या कार्यक्रमात तासाहून अधिक काळ एकत्र असूनही अबोला कायम पाहायला मिळाला. शेजारी शेजारी बसूनही दोघांच्यात चर्चा नाही. शिवाय एकमेकांसोबतच चर्चा करण्याचं टाळलं. पक्ष सोडून गेल्यानंतर सुळे यांची अनेकवेळा मुश्रीफ यांच्यावर टीका आहे. आज देखील कोल्हापूर दौऱ्यावर त्या आल्या असताना मंत्री मुश्रीफ यांच्यावर टीका केली. मुश्रीफ यांच्या पत्नी ईडीला भिडल्या पण मुश्रीफ घाबरले, असे त्या म्हणाल्या.

विधानसभा निवडणुकीत यांच्या विरोधात खासदार सुप्रिया सुळे या दोन वेळा कागल विधानसभा मतदारसंघात प्रचारात आल्या होत्या. त्यावेळी देखील मुश्रीफ यांच्यावर टीका करताना, घरातील महिला ईडीला घाबरल्या नाहीत. पण घरातले पुरुष घाबरले, अशा शब्दात टीका केली होती.

ज्या ज्या वेळी खासदार सुप्रिया सुळे कोल्हापूर दौऱ्यावर आल्या त्या त्यावेळी मुश्रीफ बहिणीप्रमाणे राखण करत असत. ईडी कारवाईनंतर देखील त्यांनी मुश्रीफ यांच्या बाजूने ठाम राहण्याची भूमिका घेतली होती. मात्र राष्ट्रवादीचे नेते शरद पवार यांची साथ सोडल्यानंतर सुप्रिया सुळे यांनी थेट मुश्रीफ यांच्यावर टीकास्त्र सोडले होते.

दरम्यान कार्यक्रमाच्या अध्यक्ष भाषण संपल्यानंतर सुप्रिया सुळे आणि वैद्यकीय हसन मुश्रीफ यांनी एकमेकांसोबत थोडक्यात चर्चा केली. सुळे यांनी आपल्या भाषणात, आज या व्यासपीठावर मला माझे सहकारी भेटले. राजकारण होत राहील, पण रिश्ते टिकले पाहिजेत. पवार साहेब यांचा वारसा मी कायम जपतं राहिण. नातं जपण्याचे काम माझ्याकडून होत राहील. जी राजकारण वेगळी गोष्ट असल्याचंही म्हणत हसन मुश्रीफ यांना उद्देशून वक्तव्य केलं आहे.