Rohit Pawar News : मराठा समाजाच्या तोंडाला पाने पुसू नका ; रोहित पवारांचा मुख्यमंत्र्यांना टोला

Nagar : "मराठा समाजाला आरक्षण मिळावे,' या मागणीसाठी मनोज जरांगे यांचे उपोषण सुरु आहे. गेल्या दोन दिवसांपासून कर्जत तालुक्यातील कोपर्डी गावामध्येही मराठा समाजाकडून उपोषण सुरू करण्यात आले आहे. आज (गुरुवारी) या उपोषणकर्त्यांची कर्जत जामखेडचे आमदार रोहित पवार यांनी भेट घेतली. रोहित पवारांनी मुख्यमंत्री एकनाथ शिंदे यांच्यावर टीका केली.

"मराठा समाजाच्या आरक्षणाचा प्रश्न सोडवायचा असेल तर महाराष्ट्र सरकारने विशेष अधिवेशन बोलवून केंद्र सरकारला मराठा आरक्षणाबाबतचा ठराव पाठवून द्यावा. केंद्र सरकारच्या विशेष अधिवेशनामध्ये हा ठराव मंजूर झाल्यानंतर तो कायदा होऊन आरक्षणाचा प्रश्न सुटू शकतो. कुणबी समाजाचे दाखले देण्याबाबतचा निर्णय हा फक्त काही ठराविक जणांबाबत नसावा, त्यामुळे इतरांचा प्रश्न तसाच प्रलंबित राहू शकतो. मुख्यमंत्री एकनाथ शिंदे यांनी मराठा समाजाच्या तोंडाला पाने पुसू नयेत," असा टोलाही रोहित पवार यांनी लगावला.

मनोज जरांगे यांच्याकडून सरकारला चार दिवसाची मुदत देण्यात आली होती. सरकारने जरांगे पाटील यांच्याकडे मराठा समाजाच्या आरक्षणाच्या मुद्द्याप्रकरणी एक महिन्याची वेळ मागितली होती. परंतु, सरकारला आधीच तीन महिन्यांची मुदत देऊनसुद्धा त्यांच्याकडून कोणतीच पाऊले उचलण्यात न आल्याने त्यांनी येत्या चार दिवसांत योग्य तो निर्णय घ्यावा, असे मनोज जरांगे यांच्याकडून सांगण्यात आले. आज (गुरुवार) मनोज जरांगे हे चर्चा करून आपला निर्णय जाहीर करणार असल्याचे सांगण्यात आले आहे.

काल (बुधवारी) मंत्रिमंडळाच्या बैठकीत सरकारकडून मराठा आरक्षणासंदर्भातील महत्त्वाचा निर्णय घेण्यात आला. ज्यांच्याकडे महसुली, शैक्षणिक किंवा निजामकालीन नोंदी असतील त्यांना कुणबी दाखले दिले जाणार आहेत. त्यासाठी निवृत्त न्यायाधीशांची समिती स्थापन केली आहे. न्यायाधीश संदीप शिंदे आणि इतर अधिकारी अशा पाच सदस्यांची समिती आहे.

Edited By : Mangesh Mahale