चंद्रकांत पाटलांचा कोल्हापुरात राष्ट्रवादीला धक्का: महत्वाचा मोहरा लावला गळाला!

कोल्हापूर : कोल्हापूर (kolhapur) उत्तर मतदारसंघाच्या पोटनिवडणुकीच्या पार्श्वभूमीवर भारतीय जनता पक्षाचे प्रदेशाध्यक्ष चंद्रकांत पाटील (Chandrakant Patil) यांनी राष्ट्रवादी काँग्रेसला (ncp) धक्का दिला आहे. राष्ट्रवादी काँग्रेसचे संदीप देसाई यांनी आज (ता. ३१ मार्च) भाजपमध्ये (BJP) प्रवेश केला. चंद्रकांतदादांनी त्यांचे पक्षात स्वागत करत देसाई यांना राज्यस्तरावरील पद दिले आहे. भाजपमध्ये प्रवेश करताच देसाई यांची भाजप युवा मोर्चाच्या प्रदेश उपाध्यक्षपदी नियुक्ती करण्यात आली आहे. (NCP's Sandeep Desai joins BJP)

प्रदेशाध्यक्ष चंद्रकांत पाटील यांनी संदीप देसाई यांचे पक्षात स्वागत करुन त्यांच्या पुढील वाटचालीस शुभेच्छा दिल्या. तसेच, त्यांची भाजपा युवा मोर्चा प्रदेश उपाध्यक्षपदी नियुक्ती करून, त्यांना पत्रही प्रदान करण्यात आले. देसाई यांनी गेल्या वर्षी राष्ट्रवादी काँग्रेसमध्ये प्रवेश केला होता. मात्र, त्या ठिकाणी त्यांचे मन काही रमले नाही. काही महिन्यांतच त्यांनी स्वगृही परतण्याचा निर्णय घेतला आहे.

संदीप देसाई यांच्या भाजप प्रवेशानंतर चंद्रकांत पाटील म्हणाले की, देसाई हे सामाजिक जाणीव असणारे कार्यकर्ते आहेत. ते स्वगृही भाजपमध्ये परतल्याने आनंद झाला. भाजपचा विचार घरोघरी पोचवून उत्तर मतदारसंघात सत्यजित कदम यांना निवडून आणण्यात त्यांचे मोठे योगदान असेल, असा मला विश्वास वाटतो.

संदीप देसाई हे पूर्वी भाजपमध्ये सक्रिय होते. युवा मोर्चाचे अध्यक्ष, जिल्हाध्यक्ष म्हणूनही त्यांनी काम केले आहे. गेल्या वर्षी त्यांनी राष्ट्रवादी काँग्रेसमध्ये प्रवेश केला होता. मात्र आज त्यांनी पुन्हा भाजपमध्ये प्रवेश केला. भाजपमध्ये प्रवेश केल्यानंतर देसाई म्हणाले की, मी नेहमीच राष्ट्रीय विचाराने सामाजिक काम करतो, त्यामुळे भाजपकडे माझा ओढा होताच. नव्याने पक्ष प्रवेश करून पक्ष अधिक मजबूत करण्यासाठी मी प्रयत्न करेन.

जिल्हाध्यक्ष राहुल चिकोडे, सरचिटणीस हेमंत अराध्ये, विवेक कुलकर्णी, सचिन तोडकर, प्रवीण चौगुले रमेश दिवेकर रोहित पाटील नरेश जाधव अविनाश साळे दीपक देसाई राहुल घाडगे रोहित फराकटे अवधूत कोळी यांच्यासह कार्यकर्ते उपस्थित होते.