Varah Jayanti : अमोल मिटकरींचा नीतेश राणेंना सल्ला; ‘वराह जयंतीची सुरुवात स्वतःच्या घरापासून करावी’

Solapur, 21 August : राज्यात येत्या 25 ऑगस्ट रोजी वराह जयंती साजरी करण्यात यावी, अशी मागणी मत्स्यव्यवसाय आणि बंदरे मंत्री नीतेश राणे यांनी मुख्यमंत्री देवेंद्र फडणवीस यांना पत्र लिहून केली आहे. त्यावरून महायुतीमधील घटकपक्ष असलेल्या राष्ट्रवादी काँग्रेसचे आमदार अमोल मिटकरी यांनी राणेंचा समाचार घेतला आहे. ‘वराह जयंतीची सुरुवात नीतेश राणे यांनी स्वतःच्या घरापासून करावी. काही वराह असतील तर त्यांनी ते पकडून आणावेत आणि त्याची पूजा करावी,’ असा टोला मिटकरी यांनी लगावला आहे.

सोलापूरच्या दौऱ्यावर आलेले अमोल मिटकरी (Amol Mitkari) यांनी मंत्री नीतेश राणे यांनी मांडलेल्या भूमिकेवर तिरकस टीकास्त्र सोडले. ते म्हणाले, वराह जयंतीची सुरुवात नीतेश राणे यांनी स्वतःच्या घरापासून करावी. काही वराह असतील तर त्यांनी ते पकडून आणावेत आणि त्याची पूजा करावी. वराह जयंती म्हणजे पोस्टरची पूजा नाही.. प्रत्यक्ष वराह पकडून आणायचे आणि त्याची पूजा करायची. वराहची पूजा त्यांनी घरी करावी, त्यासाठी त्यांना शुभेच्छा...

शेतकऱ्यांवर पुराचं सावट आहे आणि उद्या शेतकऱ्यांच्या काळजातला सण बैलपोळा आहे. शेतकऱ्यांच्या डोळ्यात पाणी आहे, हे राहिलं बाजूला आणि काहीतरी दिशाभूल करायची. वराह जयंती आम्ही कधी पाहिली नाही, असा टोला मिटकरी यांनी नीतेश राणे (Nitesh Rane) यांना लगावला.

ते म्हणाले, श्री कृष्णाची जन्माष्टमी आपण साजरी केली. त्यांच्या मूर्तीची पूजा केली; कारण कृष्ण हे पुराण पुरुष आहेत. रामाची रामनवमी करतो, कारण ते पुराणपुरुष आहेत आणि छत्रपती शिवाजी महाराज यांची जयंती साजरी करतो, कारण ते इतिहास पुरुष आहे....आज ते हयात नाही.

विष्णूच्या बारा अवतारांमध्ये वराह अवतार आहे का? तर ते आहे. वराह जयंती साजरा करताना पूजा झाली पाहिजे. हे मी म्हणत नाही, तर स्वातंत्र्यवीर सावरकर यांनी लिहिलेल्या पुस्तकात म्हटले आहे..त्यालाच फक्त आमचे परममित्र नीतेश राणे यांनी फॉलो केलं पाहिजे. वराह पूजनाची सुरुवात स्वतःपासून त्यांनी करावी, असा सल्लाही आमदार अमोल मेटकरी यांनी दिला.

केंद्र सरकारने ऑनलाईन गेमच्या विरोधात आणलेल्या विधायकाचे स्वागत केलं पाहिजे. ऑनलाईन ‘गेमिंग’मुळे विद्यार्थ्यांचं आर्थिक शोषण मोठ्या प्रमाणात होत आहे, असेही मिटकरी यांनी नमूद केले.