Raju Shettis Announcement : राजू शेट्टींची मोठी घोषणा; ‘स्वाभिमानी’त यापुढे राजकीय नेते-कार्यकर्त्यांना प्रवेश नाही

Pandharpur News : माजी खासदार राजू शेट्टी यांनी आज (ता. ३ ऑक्टोबर) स्वाभिमानी शेतकरी संघटनेच्या संदर्भात मोठा निर्णय घेतला आहे. स्वाभिमानी शेतकरी संघटनेत यापुढे कोणत्याही राजकीय पक्षाच्या कार्यकर्त्याला किंवा नेत्यांना प्रवेश दिला जाणार नाही. पक्षातील कार्यकर्त्यांना संधी देऊन पक्षसंघटना मजबूत करण्याचा निर्णय घेण्यात आला आहे. राजू शेट्टी यांनी याबाबतची घोषणा पंढरपुरात केली आहे. शेट्टी यांच्या घोषणेची राजकीय वर्तुळात मोठी चर्चा रंगली आहे. (Raju Shetti's big announcement; Political leaders-activists no entry in to 'Swabhimani')

राज्यातील साखर कारखानदारांनाही राजू शेट्टी यांनी इशारा दिला आहे. ‘मागील हंगामात गाळप झालेल्या उसाचे थकीत ४०० रुपये दिल्याशिवाय एकाही साखर कारखान्याचे धुराडे पेटू देणार नाही,’ असेही शेट्टी यांनी म्हटले आहे. तसेच, साखर निर्यातीवरील बंदीही केंद्र सरकारने त्वरित मागे घ्यावी, अशी मागणीही त्यांनी केली.

सोलापूर जिल्ह्यातील स्वाभिमानी शेतकरी संघटनेच्या पदाधिकाऱ्यांची बैठक पंढरपूर येथे राजू शेट्टी यांच्या उपस्थितीत आज झाली. त्या बैठकीत पक्षसंघटनेबाबत वरील निर्णय घेण्यात आलेला आहे. त्याबाबतची घोषणा शेट्टी यांनी पत्रकार परिषदेत केली. तसेच, त्यांनी अनेक मुद्द्यांवर आपली भूमिका स्पष्ट केली.

राज्यातील साखर कारखान्यांना सरकारने ठरवून दिलेल्या साखर विक्रीच्या किमतीपेक्षा प्रतिक्विंटल ५०० रुपये अधिकचे मिळाले आहेत. इथेनॉलचा खरेदीदरही वाढला आहे. त्यामुळे साखर कारखान्यांनी ऊस उत्पादकांना प्रतिटन ४०० रुपये देणे अपेक्षित आहे. ती थकीत रक्कम लवकर द्यावी; अन्यथा साखर कारखान्याच्या विरोधात आंदोलन केले जाईल, असा इशाराही त्यांनी दिला.

माजी खासदार राजू शेट्टी यांनी उपमुख्यमंत्री अजित पवार यांच्या भूमिकेचेही समर्थन केले. राज्य सरकारने साखर कारखान्यांना थकहमी देऊ नये. तसेच भाजप नेत्या पंकजा मुंडे यांच्या वैद्यनाथ साखर कारखान्याकडे जीएसटीचा कर थकला असेल, तर तो त्यांनी भरणे अपेक्षित आहे. जीएसटीची कारवाई ही त्या विभागाचे काम आहे, असं सांगत वैद्यनाथ कारखान्यावरील कारवाईचे शेट्टी यांनी समर्थन केले आहे.