Mushrif Counterattack On Rohit Pawar : रोहित पवारांना अजितदादांची जागा घ्यायची आहे; हसन मुश्रीफांचा पलटवार

Mumbai News : आमदार रोहित पवार यांना तिकडं उपमुख्यमंत्री अजित पवार यांची जागा घ्यायची आहे. ते नवखे आहेत, एवढे धाडस ते कशासाठी करत आहेत, अशा शब्दांत राज्याचे वैद्यकीय शिक्षण मंत्री हसन मुश्रीफ यांनी पलटवार केला. (Rohit Pawar wants to replace Ajitdad : Hasan Mushrif's counterattack)

ज्येष्ठ नेते शरद पवार यांची उद्या (ता. २५ ऑगस्ट) कोल्हापुरात सभा होत आहे. त्या पार्श्वभूमीवर आमदार रोहित पवार यांनी पत्रकार परिषद घेत हसन मुश्रीफ यांच्यावर हल्लाबोल केला हेाता. त्याला उत्तर देताना मंत्री मुश्रीफ यांनी काही सवाल केले. ते म्हणाले की, कोल्हापुरात राष्ट्रवादी काँग्रेसचे सहा आमदार होते. आता का कमी झाले आहेत. पुण्यातदेखील अशी परिस्थिती झाली आहे.

कागल एमआयडीसीत माझा हस्तक्षेप वाढत आहे, असे रोहित पवारांचे म्हणणे असेल तर तिथल्या कारखानदारांना जाऊन विचारा. म्हणजे तुमच्या लक्षात येईल. कागल एमआयडीसीत एक इंचही जागा शिल्लक नाही. त्यांनी अधिक माहिती घ्यावी. नोकऱ्या आमच्या भुमिपुत्रालाच मिळणार ना. कारण त्यांच्या जमिनी गेल्या आहेत. कोणता लोकप्रतिनिधी तसे प्रयत्न करणार नाही. आरोप करायला जागा नसल्याने ते असे आरोप करत आहेत, अशी टीकाही रोहित पवार यांच्यावर मुश्रीफ यांनी केली.

कोल्हापूरमधून विरोध असूनही शरद पवार यांनी हसन मुश्रीफ यांना उमेदवारी दिली, असेही रोहित पवार यांनी म्हटले हेाते. त्याला उत्तर देताना मुश्रीफ म्हणाले की, मला १९९८ मध्ये कुणाचा विरोध होता, हे जाहीरपणे सांगावे. सदाशिवराव मंडलीक साहेब तर माझे नेते होते, त्यांचा तर मला विरोध नव्हता. मग कुणाचा विरोध होता, हे त्यांनी जाहीरपणे सांगावे. शरद पवार यांच्यामुळे आम्हाला राजकारणात स्थान मिळाले, हे आम्ही कधी नाकारणार नाही.

शरद पवार यांना एवढ्या छोट्या मैदानात आणायला नको होते. त्या दसरा मैदानात जास्तीत जास्त पाच हजार लोक बसू शकतील. पवारांची सभा ऐकायला सांगली, इस्लामपूरमधून लोक येणार. साहेब काय बोलतात, हे बघायला येणार. काही आमची माणसं ऐकायला जाणार. त्यांच्या सभेला गर्दी व्हावी, या आमच्या शुभेच्छा आहेत, असे हसन मुश्रीफ यांनी नमूद केले.