Sangli Municipal Election : इच्छुकांच्या मनधरणीसाठी CM फडणवीस सांगलीत येणार, महापालिका निवडणुकीच्या प्रचाराचा नारळ फोडणार...

Sangli News, 01 Jan : सांगली-मिरज-कुपवाड महानगरपालिकेमध्ये भाजपमध्ये इच्छुकांची भाऊ गर्दी आहे. त्यातच बंडखोरीचे प्रमाण देखील वाढलं आहे. मात्र हीच बंडखोरी थांबवण्यासाठी भाजपच्या जिल्हास्तरावरून ते राज्यस्तरावरून मोठे हालचाली सुरू आहेत.

येत्या दोन दिवसात अर्ज माघार घेण्यासाठी हालचाली असणार आहेत. या हालचालीनंतर पुढील बारा दिवस या इच्छुकांना घेऊन मनधरणीसाठी सांगली भाजपकडून थेट मुख्यमंत्र्यांनाच पहिल्या दिवशी प्रचार शुभारंभाला निमंत्रण देण्यात आलं आहे. माघारीची मुदत संपल्यानंतर शनिवारी तीन जानेवारीपासून मुख्यमंत्री देवेंद्र फडणवीस यांच्या हस्ते नारळ फोडून सर्वच उमेदवारांच्या प्रचाराचा शुभारंभ होणार आहे.

"सांगली, मिरज आणि कुपवाड शहर महापालिकेच्या निवडणूक मैदानात भारतीय जनता पक्ष पूर्ण ताकदीने आणि तयारीने उतरत आहे. निवडणुकीच्या प्रचाराची आखणी सुरू आहे. राज्यातील सर्व प्रमुख नेते निवडणुक प्रचारात येण्याचे नियोजन सांगली भाजपकडून करण्यात आले आहे. सांगलीचे पालकमंत्री चंद्रकांत पाटील यांच्या मार्गदर्शनानुसार तयारी सुरू आहे.

इच्छुकांची प्रचंड संख्या आणि त्यांची, तसेच त्यांच्या समर्थकांची आग्रही मागणी अशा वातावरणात भाजपने उमेदवार निश्चितीसाठीची कसरत यशस्वीपणे पार पाडली आहे. या काळात नाराज इच्छुकांबरोबर संपर्काचे प्रयत्न सुरू होते. नेते, पदाधिकाऱ्यांची त्यासाठी धावपळ सुरू होती. नाराज इच्छुक आणि कार्यकर्त्यांबरोबर भेटी सुरू होत्या.

केंद्रीय मंत्री रामदास आठवले यांच्या नेतृत्वातील रिपब्लिकन पक्षाबरोबर भाजपची युती झाली आहे. त्याचवेळी जनसुराज्य पक्षाबरोबर काही जागांसाठीची युतीची चर्चा अंतिम टप्प्यात आहे. पक्षाचे वरिष्ठ नेते यासंदर्भात निर्णय घेतील असे नेते मकरंद देशपांडे त्यांनी सांगितले आहे. पक्ष पूर्ण तयारीने आणि शक्तीने या महापालिका निवडणुकीच्या मैदानात उतरत आहे.

पालिका क्षेत्राच्या विकासाचा अजेंडा घेऊन निवडणुकीच्या मैदानात उतरत आहोत. पुढील दहा वर्षांच्या विकासाचे व्हिजन ठरवले आहे. त्यासाठी प्रत्येक प्रभागानुसार पुढील कामाचे नियोजन करण्यात येत आहे. पालिकेच्या प्रत्येक प्रभागात इच्छुकांची प्रचंड गर्दी होती. त्यातूनही समन्वय साधत पक्षाने उमेदवार निश्चित केले असल्याचे देशपांडे म्हणाले