Bharat Gogawale : ‘भरतशेठ, फक्त घाटमाथा चढला की शांततेत ये’; संजय शिरसाटांनी गोगावलेंना असा सल्ला का दिला?

Solapur, 04 August : रामभाऊ आम्हाला कधीही बोलवा, आम्हाला सार्वजनिक काम करायला इंटरेस्ट आहे. भरतशेठ गोगावले तर तुम्हाला माझ्यापेक्षा जवळ आहे. मी नाही आलो तरी भरतशेठ माझ्यातर्फे येईल. घाटमाथ्याच्या खाली तोच आहे, फक्त घाटमाथा चढला की शांततेत ये, असा उपरोधिक सल्ला सामाजिक न्यायमंत्री संजय शिरसाट यांनी आपलेच सहकारी रोजगार हमी योजना मंत्री भरत गोगावले यांना दिला.

भरत गोगावले (Bharat Gogawale) यांना दिलेल्या सल्ल्याची बातमी होऊ शकते, हे लक्षात येताच, आता ह्याची बातमी करू नका. तुमचा काय भरोसा नाही. प्रेमाने म्हटलो तर तुम्ही लगेच भरतशेठला संजय शिरसाटांनी दिला इशारा, असं काही करू नका, अशी विनंतीही त्यांनी माध्यमांना केली.

मंत्री संजय शिरसाट (Sanjay Shirsat) आणि भरत गोगावले हे आज सोलापूर जिल्ह्यातील माळशिरस तालुक्याच्या दौऱ्यावर आले होते. त्या दौऱ्यात माजी आमदार राम सातपुते यांच्या घरी भेट दिल्यानंतर माध्यमांशी बोलताना शिरसाट यांनी हे अजब विधान केले आहे.

ते म्हणाले, घरातील व्हिडिओ काढतात. आता घरात काय सूटबुटात बसावं का. पण, चिंता त्याची नाही. दुश्मन कुठपर्यंत पोचले आहेत, हे लक्षात ठेवा. आपल्याला मोठ होऊ द्यायचं नाही, असं काही लोकांचं टार्गेट असतं. त्या टार्गेटला आपल्याला उत्तर द्यायचं आहे. मी समाज कल्याण खातं जेव्हा घेतलं, तेव्हा १२०० कोटींचा निधी फक्त वसतिगृह बांधण्यासाठी राखीव ठेवला आहे. आतापर्यंत माझ्याकडे ४८ प्रस्ताव आले आहेत. ज्यांचे प्रस्ताव आले आहेत, त्यांना लिहून देण्यात आले आहे की, तुमचा प्रस्ताव मंजूर करण्यात आलेला आहे.

मी राज्यातील सर्व आमदारांना सांगितले आहे की, तुम्ही रस्त्यासाठी पैसे मागू नका, दोन वर्षांत रस्ता खराब होऊन जातो. वसतिगृह उभा केले तर पन्नास वर्षे लोक तुमचे नाव घेतील. रामभाऊ तुम्ही पुढाकार घ्या, माळशिरसमध्ये मुलांच्या हॉस्टेलसाठी दहा, तर मुलींच्या हाॅस्टेलसाठी दहा कोटी रुपये देतो. हा संजय शिरसाट आहे, बोललं तसं करतो, असा शब्दही संजय शिरसाट यांनी राम सातपुते यांना दिला.

सातपुते म्हणाले, अण्णाभाऊ साठे यांच्या जन्मगावी त्यांचे स्मारक उभारण्यात येणार आहे, त्यासाठी आम्ही २५ कोटी रुपये दिले आहेत. येत्या महिनाभरात त्याचे भूमिपूजन होईल. चांगलं काम करण्यासाठी आपण कुठेही मागे राहणार नाही.