Satara : राष्ट्रवादी काँग्रेसचा बालेकिल्ला कायम राखणार... श्रीनिवास पाटील

Wai News : जनतेच्या अडचणी सोडविणे, राज्याच्या प्रगतीच्या योजना राबविण्यात राष्ट्रवादी काँग्रेस आघाडीवर आहे. साताऱ्याचा खासदार होण्याचा आनंद वेगळा आहे. राष्ट्रवादी काँग्रेसचा NCP बालेकिल्ला कायम राखूया, असे आवाहन सातारचे खासदार श्रीनिवास पाटील Srinivas Patil यांनी केले.

मेणवली (ता.वाई) येथे १ कोटी ८६ लाख रुपये खर्चाच्या जलजीवन मिशन पाणीपुरवठा योजना, पर्यटन निधी व आमदार विकास निधीतून ५० लाख ५० हजार रुपये खर्चाच्या रस्ते डांबरीकरण, सभामंडपाच्या भूमिपूजन, उद्घाटनप्रसंगी ते बोलत होते.

राष्ट्रवादीचे प्रदेश चिटणीस प्रतापराव पवार अध्यक्षस्थानी होते. जिल्हा बँकेचे अध्यक्ष नितीन पाटील, किसन वीरचे उपाध्यक्ष प्रमोद शिंदे, दिलीप पिसाळ, शशिकांत पवार, विक्रांत डोंगरे, मोहन जाधव, शंकरराव शिंदे, मनीषा गाढवे, रवींद्र मांढरे, प्रल्हाद गाढवे, मदन भोसले, आनंद चिरगुटे आदी उपस्थित होते.

खासदार पाटील म्हणाले, मेणवली येथे पर्यटन विकासाला मोठा वाव आहे. आमदार मकरंद पाटील व आपण त्याकामी मदतीचा हात देऊ. आमदार पाटील यांनी प्रत्येक निवडणुकीत या गणातून पक्षाला मोठे मताधिक्य मिळाल्यामुळे जनतेच्या अडचणी सोडविणे, विकास कामांना निधी देणे, हे कर्तव्यच आहे. रस्ते, पिण्याच्या पाणी योजनांच्या अंमलबजावणीसाठी आम्ही धोरण घेऊन काम करतो. राज्य सरकारच्या पाणंद विकास योजनेतून रस्त्यांची कामे मार्गी लावण्याचे आश्वासन त्यांनी दिले.