Satara Politic's : शिवेंद्रराजेंनी निवडणुकीआधीच गेम फिरवला; सातारा जिल्हा बॅंकेच्या निवडणुकीत महत्वाची घडामोड...

Satara, 27 July : सातारा जिल्हा मध्यवर्ती सहकारी बॅंकेची निवडणूक येत्या तीन महिन्यांत होणार आहे. त्या पार्श्वभूमीवर जिल्ह्यात सहकारी सोसायट्यांकडून मतदानासाठी ठराव करण्यात येत आहेत. जावळी तालुक्यात सार्वजनिक बांधकाम मंत्री शिवेंद्रसिंहराजे भोसले आणि राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे यांच्यात ठरावावरून जोरदार रस्सीखेच पाहायला मिळत आहेत. मात्र, जिल्हा बॅंकेच्या निवडणुकीआधीच शशिकांत शिंदेंना जोरदार धक्का बसला असून हक्काच्या दोन सोसायट्यांनी भाजपचे शिवेंद्रसिंहराजे भोसले गटाच्या नावाने ठराव केले आहेत, त्याचा शिंदेंच्या जिल्हा बॅंकेतील ‘एन्ट्री’वर किती परिणामकारक ठरतो, हे पाहावे लागणार आहे.

सातारा जिल्हा मध्यवर्ती सहकारी बँकेच्या ठरावाच्या पार्श्वभूमीवर मेढा सेंटर विकास सेवा सोसायटीत सार्वजनिक बांधकाममंत्री शिवेंद्रसिंहराजे भोसले आणि राष्ट्रवादी शरदचंद्र पवार पक्षाचे प्रदेशाध्यक्ष शशिकांत शिंदे यांच्या गटांमध्ये ठरावावरून जोरदार राजकीय चुरस रंगली. अखेर शिवेंद्रराजे यांच्या गटातील डॉ. रामदास वांगडे यांच्या नावाचा ठराव मंजूर करण्यात आला.

जावळी तालुक्यातील महत्त्वाची मानल्या जाणाऱ्या मेढा सेंटर विकास सेवा सोसायटीत १२ गावांचा समावेश आहे. तालुक्यातील बहुतांश सोसायट्यांवर शिवेंद्रसिंहराजे गटाचे वर्चस्व असताना मेढा सेंटर विकास सेवा सोसायटी मात्र त्यांच्या विरोधी शिंदे गटाकडे गेली होती. मात्र, गेल्या तीन वर्षांत शिंदे गटातील काही संचालक आपल्या बाजूने वळविण्यात शिवेंद्रसिंहराजे गटाला यश आले आहे.

सातारा जिल्हा मध्यवर्ती सहकारी बॅंकेच्या ठरावासाठी झालेल्या सभेत डॉ. रामदास वांगडे यांना सूचक म्हणून सुरेश दळवी, तर अनुमोदन पुंडलिक पार्टे यांनी दिले, तर विरोधी गटाकडून सचिन जवळ यांनी अर्ज दाखल केला होता. त्यांना आनंदराव सुतार सूचक, तर गणपत गोरे यांनी अनुमोदन दिले. आठ विरुद्ध पाच मतांनी डॉ. रामदास वांगडे यांच्या नावाचा ठराव मंजूर झाला आहे.

आतापर्यंत ३४ विकास सेवा सोसायट्यांचे ठराव झाले असून, १५ सोसायट्यांचे ठराव अजून होणार आहेत. निवडणुकीचा कालावधी तीन महिने असून, भविष्यात अजून बऱ्याच घडामोडी पाहायला मिळणार आहेत.

शिवेंद्रराजेंनी हिसकावल्या दोन सोसायट्या

जावळी तालुक्यातील मेढा व गांजे गावच्या सोसायटीच्या निवडणुकीत मंत्री शिवेंद्रसिंहराजे भोसले यांना मानणाऱ्या पॅनेलचा पराभव झाला होता. मेढा सोसायटीत डॉ. रामदास वांगडे हे एकमेव उमेदवार निवडून आले होते.

गांजे सोसायटीतही पराभव झाला होता, तरीही निवडणुकीनंतर शिवेंद्रसिंहराजे यांनी आपली जादू दाखवत या सोसायटीमधील विरोधी संचालकांना आपलेसे करत दोन्ही सोसायट्यांचे ठराव आपल्या बाजूने केल्याने विरोधकांना धक्का बसला आहे. मेढ्यात तर त्यांच्या पॅनेलमधून एकमेव निवडून आलेले डॉ. रामदास वांगडे यांचा ठराव घेऊन भविष्यातील फोडाफोडीला पूर्णविराम दिला आहे.