Solapur News : सोलापूर जिल्ह्यातील अनगर नगरपंचायत निवडणूक यंदा प्रचंड गाजली. अजित पवारांच्या राष्ट्रवादी काँग्रेसला भाजपवासी झालेल्या माजी आमदार राजन पाटलांनी खटक्यावर बोट जागेवर पलटी या म्हणीचा प्रत्यय देत ग्रामपंचायतमधून नगरपंचायत झालेल्या अनगरच्या पहिल्याच निवडणुकीत 17 नगरसेवक बिनविरोध निवडून आणत राजन पाटील (Rajan Patil) आपली ताकद दाखवली होती. तसेच अनगरच्या नगराध्यक्षपदाची निवडणुकही बिनविरोध झाल्यानंतर अजित पवारांच्या राष्ट्रवादी काँग्रेसच्या उमेदवार उज्ज्वला थिटे यांनी गंभीर आरोप करत जिल्ह्यासह राज्याच्या राजकारणात खळबळ उडवून दिली होती. तसेच त्यांनी सोलापूर जिल्हा सत्र न्यायालयातही धाव घेतली होती.
आता अनगर नगरपंचायतीच्या नगराध्यक्षपदाच्या निवडणुकीत मोठी अपडेट समोर आली आहे. सोलापूर जिल्हा सत्र न्यायालयानं राष्ट्रवादी काँग्रेस पक्षाच्या नगराध्यक्षपदाच्या उमेदवार उज्वला थिटे यांचा अपील अर्ज फेटाळला आहे.हा थिटे यांच्यासाठी सर्वात मोठा धक्का मानला जात आहे. तर दुसरीकडे अनगरच्या नगरपंचायतीच्या नगराध्यक्षपदाची निवडणूक बिनविरोध होण्यावर आता शिक्कामोर्तब झालं आहे. त्यामुळे न्यायालयानं थिटेंचा अपील अर्ज फेटाळल्यानं हा राजन पाटलांसाठी मोठा दिलासा ठरला आहे.
अनगर (Angar)नगरपंचायत नगराध्यक्षपदाची निवडणूक यंदा आरोप-प्रत्यारोपांनी चांगलीच वादळी ठरली होती. गेल्या 40 वर्षांची बिनविरोधची परंपरा मोडीत काढत यावेळी राजन पाटलांचा पूर्ण 'कंट्रोल' असलेल्या अनगरमध्ये निवडणूक लागल्यानं संपूर्ण राज्याचं लक्ष या नगरपंचायतीकडे लागलं होतं.
त्यात निवडणुकीच्या तोंडावर अजितदादांना धक्का देत राजन पाटलांनी भाजपमध्ये प्रवेश केला होता. याच पार्श्वभूमीवर राष्ट्रवादी काँग्रेसकडून अनगरमध्ये उज्जवला थिटे यांना नगराध्यक्षपदासाठी उमेदवारी देण्यात आली होती. पण दाखल केलेला अर्ज छाननीत बाद करण्यात आला होता.
उज्जवला थिटे यांनी या निर्णयाविरोधात सोलापूर जिल्हा सत्र न्यायालयात धाव घेतली होती. थिटे यांच्या याचिकेवर सोमवारपासून युक्तिवाद सुरू होता. आता बुधवारी(ता.26) सोलापूर जिल्हा सत्र न्यायालयाच्या न्यायाधीशांनी दोन्ही बाजूंचा युक्तिवाद ऐकून घेतल्यानंतर निवडणूक निर्णय अधिकाऱ्यांनी दिलेला निर्णय कायम ठेवत उज्ज्वला थिटे यांचा अपील अर्ज फेटाळला आहे. जिल्हा न्यायाधीश प्रशांत राजवैद्य यांनी हा निर्णय दिला आहे.
अनगर नगरपंचायत निवडणुकीच्या काळात ‘कायद्याचं पालन झालं नसल्याचा दावा करत थिटे यांच्या वकिलानं मोठी खळबळ उडवून दिली होती. गेल्या 8 दिवसांपासून अनगर नगरपालिकेवर बिनविरोध निवडून आलेल्या राजन पाटलांच्या सून व उमेदवार प्राजक्ता पाटील यांच्या नगराध्यक्षपद जाणार की राहणार याची मोठी उत्सुकता अनगरसह सोलापूरच्या राजकारणात लागलेली होती. मात्र, न्यायालयाच्या निर्णयानंतर प्राजक्ता पाटलांचा नगराध्यक्षपदाचा मार्ग मोकळा झाला आहे.
अनगर नगरपंचायतीच्या निवडणुकीत भारतीय जनता पक्षाकडून माजी आमदार राजन पाटील यांची धाकटी सून प्राजक्ता अजिंक्यराणा पाटील, राष्ट्रवादी काँग्रेसकडून उज्वला थिटे, तर सरस्वती शिंदे यांनी अपक्ष उमेदवारी अर्ज दाखल केला होता. छाननीत सूचकाची सही नसल्याचे कारण देत उज्वला थिटे यांचा बाद करण्यात आला. त्याविरोधात थिटे यांनी न्यायालयात धाव घेतली आहे.
निवडणूक निर्णय अधिकाऱ्यांनी उज्वला थिटे यांच्या अर्जावर सुचकाची स्वाक्षरी नाही, असे सांगून अर्ज नामंजूर केल्यानंतर त्याविरुद्ध थिटे यांनी 20 नोव्हेंबर रोजी जिल्हा न्यायालयात अपील दाखल केले होते. त्या अपिलावर सोमवारी, मंगळवारी अशी दोन दिवस युक्तिवाद दोन्ही बाजूंकडून करण्यात आला. त्यामुळे कोर्टाचा नेमका निर्णय काय येतो, याकडे सर्वाचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.