ZP President : सोलापूर जिल्हा परिषद अध्यक्ष, उपाध्यक्ष अन्‌ सभापतींना मिळणार नवी कोरी वाहने

Solapur, 21 March (विठ्ठल सुतार) : नवनिर्वाचित जिल्हा परिषद अध्यक्ष, उपाध्यक्षांसह विषय समिती सभापती आणि पंचायत समिती सभापतींसाठी लवकरच नवी वाहने घेण्यात येणार आहेत. झेडपी अध्यक्ष आणि उपाध्यक्षांसाठी १५ लाखांपर्यंत, तर सभापतींसाठी १२ लाखांपर्यंतची वाहने घेता येणार आहेत, आधीची वाहने जुनी झाली आहेत, त्यामुळे नव्या गाड्या घेण्यात येणार आहेत, त्यासाठी पुरेशा निधीची तरतूद करण्यात आली आहे, अशी माहिती सोलापूर जिल्हा परिषदेचे मुख्य कार्यकारी अधिकारी कुलदीप जंगम यांनी दिली.

अध्यक्ष-उपाध्यक्ष निवडीनंतर आता २७ मार्च रोजी विषय समिती सभापती पदांसाठीच्या निवडी होणार आहेत, त्यामुळे अध्यक्ष, उपाध्यक्षांची निवड झाली आहे. आता नवे विषय सभापती निवडल्यानंतर जिल्हा परिषदेच्या (Zilla Parishad) नियमित कामकाजाला येत्या १ एप्रिलपासून सुरुवात होणार आहे.

त्यापूर्वी सोलापूर (Solapur ) जिल्हा परिषदेचे अध्यक्ष, उपाध्यक्षांसह पंचायत समितींच्या सभापतींपदासाठी नवीन वाहने देण्यात येणार आहेत. आधीची वाहने जुनी झाल्याने आणि मर्यादेपेक्षा अधिक काळ वापरल्याने १२ नवीन वाहने ताफ्यात समाविष्ट करण्यात येणार आहेत.

सोलापूर जिल्हा परिषदेचे अध्यक्ष आणि उपाध्यक्ष यांच्यासाठी १५ लाख रुपयांपर्यंतच्या किमतीची वाहने घेण्यात येणार आहेत, तर उर्वरित १० वाहने ही १२ लाख रुपये किमतीच्या मर्यादेतील असतील.

नवीन वाहने खरेदी करण्यापूर्वी दोन ते तीन कंपन्यांकडून कोटेशन मागवण्यात येणार आहेत. त्यानंतर पदाधिकाऱ्यांनी पसंत केलेल्या कंपनीचे वाहन निश्चित करण्यात येणार आहे. याबाबतची प्रक्रिया पुढील आठवड्यात सुरू करण्यात येणार आहे, असे सोलापूर जिल्हा परिषदेचे मुख्य कार्यकारी अधिकारी जंगम यांनी सांगितले.

सोलापूर जिल्ह्यातील ११ पैकी पाच पंचायत समितीच्या सभापतींची वाहने चांगल्या स्थितीत आहेत. उर्वरीत ६ सभापतींकडील वाहने जुनी आहेत, त्यामुळे ६ पंचायत समिती सभापतींसाठीही नवीन वाहने खरेदी करण्यात येणार आहेत. एका वाहनाच्या किमतीची मर्यादा १२ लाख रुपयांपर्यंतची आहे. लवकरच सर्व सभापतींना वाहने उपलब्ध करण्यात येणार असल्याचे सीईओ जंगम यांनी स्पष्ट केले.