Jadhav- kshirsagar Politics : जनतेची दिशाभूल थांबवावी ; कोल्हापूर शहर हद्दवाढीवरुन जाधव-क्षीरसागर आमनेसामने

Kolhapur Political News: कोल्हापुरची हद्दवाढ व्हावी, असे शहरवासी यांना वाटत आहे. त्यासाठी पाठपुरावा देखील सुरू आहे. पण मुंबईत कोल्हापूर हद्दवाढ बद्दल मुख्यमंत्र्यांनी कोणतीच बैठक घेतली नसताना, काहीजण चुकीची माहिती देऊन शहरवासीयांची दिशाभूल करत आहेत. त्यांनी जनतेची दिशाभूल थांबवावी, असा टोला आमदार जयश्री जाधव यांनी नियोजन मंडळाचे कार्याध्यक्ष राजेश क्षीरसागर यांना नाव न घेता लगावला.

शहराची हद्दवाढ झालीच पाहिजे, यासाठी मीही आग्रही आहे. त्या संदर्भात पाठपुरावा सुरू आहे. हद्दवाढीबाबत प्रशासकीय पातळीवर हालचाली सुरू आहेत. राज्य नियोजन मंडळाचे अध्यक्ष राजेश क्षीरसागर यांनी हद्दवाढीबाबत बुधवारी मुख्यमंत्र्यांनी बैठक घेतल्याची माहिती दिली होती.

त्याला प्रत्युत्तर देताना आमदार जयश्री जाधव म्हणाल्या, महापालिकेच्या हद्दवाढीबाबत मुंबईत कोणतीच बैठक मुख्यमंत्र्यांनी घेतली नसताना काहीजण कोल्हापूरकरांची दिशाभूल करत आहेत. मंत्रालयातून १ सप्टेंबरपासूनचा मुख्यमंत्र्यांच्या कार्यालयीन कामकाजाची माहिती घेतली असता, कोल्हापूर हद्दवाढीबाबत मुख्यमंत्र्यांनी कोणतेही बैठक घेतली नसल्याचे स्पष्ट होत आहे.

कोल्हापूर शहराच्या हद्दवाढीचा प्रश्न गेल्या काही वर्षापासून प्रलंबित आहे. शहराची हद्दवाढ झालीच पाहिजे, ही जनभावना आहे. त्यामुळे कोल्हापूरची हद्दवाढ झालीच पाहिजे, यासाठी सातत्याने पाठपुरावा सुरू आहे. हद्दवाढीबाबत मुख्यमंत्री, उपमुख्यमंत्री यांना निवेदने दिली आहेत. लक्षवेधी, औचित्याच्या मुद्दा याच्या आधारे विधानसभेत हद्दवाढीचा प्रश्न उपस्थित केला होता. यावेळी मंत्री उदय सामंत यांनी महापालिका निवडणुकीनंतर हद्दवाढ करण्याचे आश्वासन दिले होते. याबाबत नाराजी व्यक्त करून, हद्दवाढीचा प्रश्न त्वरित सोडवावा यासाठी पाठपुरावा सुरू आहे.  असेही आमदार जयश्री जाधव म्हणाल्या.

Edited By- Anuradha Dhawade