Supriya Sule : पुढच्या मेळाव्याला दोन्ही राष्ट्रवादी एकत्र येणार का? सुप्रिया सुळेंचं मोठं विधान; म्हणाल्या…

Pune News : राज्यात ठाकरे बंधु आणि शरद पवार-अजित पवारही एकत्र येण्याच्या राजकीय चर्चा सुरू झाल्या आहेत. ज्यापद्धतीने राज ठाकरे आणि उद्धव ठाकरे यांनी एकत्र यावेत यासाठी शिवसैनिक आग्रही आहेत. त्याचपद्धतीने दोन्ही राष्ट्रवादीही एकत्र याव्यात असे मत कार्यकर्त्यांचे आहे. यावरून राष्ट्रवादी काँग्रेस शरदचंद्र पक्षाच्या खासदार सुप्रिया सुळे यांना पत्रकांरांनी प्रश्न विचारला असताना त्यांनी गुगली टाकणारं उत्तर दिलं आहे.

यावेळी खासदार सुप्रिया सुळे यांना पत्रकांरांनी, दोन्ही काँग्रेसचा वर्धापन दिन वेगवेगळ्या ठिकाणी केला जातोय. पण आगामी वर्धापन दिन एकत्र होणार का असा सवाल केला होता? या प्रश्नावर त्यांनी, आपली जी इच्छा आहे ती मी माझ्या वरिष्ठांना कळवते, असे उत्तर दिलं आहे.

तसेच ज्या चार आमदारांनी आणि कार्यकर्त्यांनी आपल्या भावना बोलून दाखवल्या आहेत, त्यावर देखील खासदार सुप्रिया सुळे यांनी आपली प्रतिक्रिया दिली आहे. सुळे यांनी, राष्ट्रवादी ही एक संघटना असून ती शरद पवार यांच्या नेतृत्वाखाली काम करत आहेत. गेल्या 26 वर्षांच्या कालावधीत पक्षाच्या वाढीसाठी नेत्यांसह पदाधिकारी, कार्यकर्ते यांचे खूप मोठे योगदान आहे. हे टीमवर्क असल्याचेही सुळे यांनी म्हटलं आहे.

हे काम कुण्या एकट्याचे नाही. पण आज अवर्जून दिवंगत आर आर पाटील यांची आठवण येत असल्याचेही सुळे यांनी सांगितलं. तर अशा अनेक व्यक्ती होत्या. ज्या अध्यक्ष राहिल्या होत्या. पण आज त्या आपल्यात नाहीत. कोणी पक्ष सोडून गेलं आहे. पण त्या गोष्टी आता काढायच्या नसतात. येथे प्रत्येकाच्या कार्याचा मानसन्मान झालाच पाहिजे, असे मत आपले असल्याचेही सुप्रिया सुळे यांनी म्हटलं आहे.

दरम्यान राष्ट्रवादी काँग्रेस पार्टीच्या दोन्ही गटांचे आज मेळावे होत असून शरद पवार यांच्या गटाचा पुण्यातील बालगंधर्व येथे तर बालेवाडी येथे अजित पवारांच्या राष्ट्रवादी काँग्रेस पार्टीचा मेळावा होत आहे. यावेळी शरद पवारांचा गट अजित पवारांच्या राष्ट्रवादीत विलीन होणार असल्याची चर्चा सुरू आहे. यामुळे नक्की असं काही होतं का याकडे राज्याचं लक्ष लागलं आहे.