५६ टक्क्यांचा त्यांचा आकडा पहाटेचा, मध्यरात्रीचा की दुपारचा... शिवेंद्रसिंहराजेंचा सवाल

सातारा : उदयनराजेंच्या कार्यपद्धतीमुळेच त्यांचा प्रचार होत आहे. त्यांच्या प्रयत्नांतून झालेली चार कामे त्यांनी सांगावीत. ग्रेडसेपरेटरचे काम बोगसच आहे. त्यांनी किती व कुठलाही सर्व्हे आणू देत. त्यांचा ५६ टक्क्यांचा आकडा पहाटेचा, मध्यरात्रीचा की दुपारा आहे, असा खोचक सवाल आमदार शिवेंद्रसिंहराजे भोसले यांनी उपस्थित केला.

खासदार उदयनराजे भोसले यांनी काल शिवेंद्रसिंहराजेच माझे मुख्य प्रचारक अशी टीका केली होती. त्याला शिवेंद्रसिंहराजेंनी त्यांच्याच शैलीत उत्तर दिले आहे. ते म्हणाले, उदयनराजेंच्या कार्यपद्धतीमुळेच त्यांचा प्रचार होतो. त्यांनी त्यांच्या प्रयत्नातून आतापर्यंत झालेल्या कामांविषयी बोलावे.

सातारा शहर, तालुका व जिल्ह्यात जी कामे होतात ती यांच्यामुळे होतात. जी होत नाहीत ती आमच्यासारख्या आमदारांमुळे झाली नाहीत, अशी त्यांची भूमिका असते. त्यांच्यावर टीका करण्याची माझी अजिबात इच्छा नाही. पण, त्यांनी काही गोष्टी मान्य कराव्यात. सातारा विकास आघाडीने गेल्या पाच वर्षात पालिकेत केवळ भ्रष्टाचार केला, हे मान्य करावे.

साताऱ्यातील ग्रेडसेपरेटरचे काम हे बोगसच आहे. त्यांनी किती व कुठलेही सर्व्हे आणू दाखवले तरी त्यांचा ५६ टक्क्यांचा आकडा हा पहाटेचा, मध्यरात्रीचा की दुपारा आहे, असा प्रश्न त्यांनी उपस्थित केला. वरून जाणारी वाहनेही या सर्व्हेत धरलीत काय. पण हे काम चुकीचेच झालेले असून त्यामुळे पार्किंगची समस्या निर्माण झाली आहे. ग्रेडसेपरेटरच्या कामावर केवळ पैसा खर्च झालाय हे त्यांनी मान्य करावे, असेही शिवेंद्रसिंहराजेंनी नमुद केले.